Nang Hpam Lusha Hpe Tawn Kau Nna Karai Magam Gun Wa Ai Sara Kaba Patrick Ndup Naw Lawn

Lani mi na aten hta Nu gaw ngai hpe hkrap let chyum jawng sa na tsun ai. Raitim ngai gaw jahpawt yup rawt ai hte tsa hpak mi lu la jang she ga shaga ai re majaw chyum jawng sa lung na nloi na re ngu Nu hpe tsun ai. Nu gaw dai daram lu mayu jang shani ga ang wa lagu lu u ngu tsun dat ai ga a majaw myit masin hta hkra nna chyum jawng sa lung byin mat ai.

Sara Patrick Ndup Naw Lawn gaw Karai a magam gun ai ( 25 ) ning hpring chyeju shakawn gumhpraw jubilee poi hpe November 15, 2022 ya shani PLN St. Joseph nawku jawng wang hta galaw la lu sai rai nga ai. 

Sara Patrick Ndup Naw Lawn a Karai magam gun na shaga la hkrum ai hte seng nna ndai hku nga tsun dan ai: 

Ngai nnan e magam gun na ngu loi pyi n myit ai, lai wa sai ten nye prat gaw nam de rawng ai prat re, nam de rawng ai ngu ai gaw nye hkum hkrang hpe tsun ai re. Moi gaw ngai Kani ya prat hte nga taw ai re. 

Jahtum e gaw Hpakant de lung nna lung seng htu ai, raitim lung seng n lu hkraw ai majaw nye kahpu gaw yu wa nna Chyum jawng lung na matsun ai. Raitimung ngai chyum jawng de lawan n sa byin ai.

Lani mi hta Nu gaw hkrap let ngai hpe chyum jawng sa na tsun ai. Raitim ngai gaw jahpawt yup rawt ai hte tsa lau hku hpak  mi shawng lu la jang she ga shaga ai. Ndai zawn rai lu sha ai gaw chyum jawng de gara hku n mai sa na re ngu kanu hpe tsun ai. Dai shaloi  kanu gaw dai daram lu mayu jang mung  shani ga ang wa lagu lu u ngu tsun dat ai. Dai kanu tsun dat ai ga a majaw  myit masin hta hkra mat nna chyum jawng sa byin mat ai rai nga ai. 

Chyum jawng lung taw ai ten hta mung shakut ai, chyum laika hti ai, akyu ni hpyi rai nna gau ngwi ngwi shayawm lu mat wa nna tara hkaw sara magam hpe gun hpai lu ai re.. Karai magam gun nga ai ten hta Karai Kasang ngai hpe lit jaw sai re,  chye tim nchye tim dang lu ai daram mi gun hpai ap nawng na matu myit da sai re majaw ngai mung Sagurem langai rai sai ngu ai hpe hkam la nna magam bungli hpe galaw shakut nga ai.

Sara jan hpe mung dinghku lit gaw nye bungli nre, nanhte bungli re, ngai gaw lu yang garum na, nlu yang n garum na, No ( 1 ) nye bungli gaw nawku hpung bungli re ngu tsun da ai. Ngai mung dinghku bungli n galaw ai ngu ai gaw nre, raitimung dang ai daram gaw galaw grau nna madung dat ai gaw nawku hpung bungli re ai lam sara jan dum nta masha ni hpe chye na shangun da ai.

Daini ngai ndai zawn rai magam lu gun na mung No ( 1 ) gaw Lamyang kaw ngai hpe hkap la nawku hpung masha ni a garum madi shadaw ai, lit shatsam ya sai ginwang up Wa Jau ni, makyin jinghku ni a garum madi shadaw la ai majaw daini du hkra Karai magam gun hpai lu ai re yawng hpe chyeju dum ai lam tsun da nga ai. 

Sara kaba Patrick Ndup Naw Lawn gaw ( 25 ) ning tup Lamyang mare kaw magam gun hpai lai wa nna ya ten PLN mare de htawt sit magam gun na lit shatsam hkrum sai hte maren PLN mare na San. Mahte Sara Gaiwang a lit hkam magam hpe gun hpai taw ai rai nga ai. 

By - Julia Ja Ing 

Add new comment

1 + 0 =