Nam bat langai ngu na Philippines Mungdan Manila Cardinal a gup chyawp ahkyeng hpe Manila Nawku htingnu kaba hta sharawt noi da

Nam bat lahkawng Mungkan majan laman shakut shaja lai wa ai shi a magam bungli ni hpe shakawn shagrau ai lam hku nna, nam bat langai ngu na Manila Cardinal tai lai wa ai, Cardinal Rufino Santos a gum chyawp ahkyeng hpe lai wa sai September praw 3 ya shani Manila Nawku htingnu kaba hta noi sharawt da ai lam galaw lai wa ai rai nga ai.    

Ndai lamng hpe woi awn galaw lai wa ai Manila Cardinal Luis Antonio Tagle tsun ai hta, “Cardinal Santos hpe jaw ya lai wa ai Karai Kasang hpe chyeju dum ai, nam bat lahkawng Mungkan majan a majaw hten run mat ai Manila Nawku htingnu kaba hpe bai gram gaw gap lam galaw lai wa ai gaw Cardinal Santos rai nga ai, majan laman yak hkak lam ni hpe lai di nna shakut shaja lai wa ai shi a shakut shaja lam ni hpe shakawn shagrau ai, ndai tsawm htap ai Manila Nawku htingnu kaba gaw Cardinal Santo a shakut shaja ai lam ni a apu asi rai nga ai” nga nna tsun lai wa ai.   

“Ndai Nawku htingnu kaba hpe gram gaw gap lam galaw lai wa ai, 1958 ning hta nnga mat wa sai Cardinal Santo hpe shakawn shagrau ai hku nna shi lang lai wa ai Cardinal ni a masat masa gup chyawp ahkyeng hpe Manila Nawku htingnu kaba hta sharawt noi ai lam galaw ai rai nga ai, nga nna mung, Manila nawku htingnu kaba a ginwang up jaw Reginald Malicdem kaw nna tsun lai wa ai.

Cardinal ni a masat masa gup chyawm ahkyeng ngu ai gaw, ban byau lawm ai ahkyeng nsam re ai gum chyawp rai nga ai. Ndai gup chyawm ahkyeng lang ai lai htung masa hpe nawku hpung kaw nna 1969 ning dawm kau lai wa sai raitim, nnga mat wa sai Cardinal ni hpe shakawn shagrau ai hku nna nawku htingnu kaba ni hta noi sharawt da ai lam ni gaw galaw ai rai nga ai.  

Cardinal Santos gaw, nam lahkawng majan a majaw hten za lam ni law law nga nga ai Manila hpe 1953 ning kaw nna woi awn lai wa ai Cardinal rai nga ai. Manila hpe Japan ni up hkang nga ai aten dai shaloi na Manila saradaw kaba Michael O’Doherty a malai htawng rawng ya ai hku nna saradaw kaba a asak hpe hkye ya lai wa ai wa mung rai nga ai.1944 ning Feb praw 4 kaw nna 1945 ning Fen praw 5 du hkra htawng sharawng hkrum ai the zingri zingrat lam ni mung hkrum lai wa ai. Shi hpe htau sat kau na matu masat da ai nhtoi du na lahkawng masum ya sha ra sai laman Manila hpe American ni shalawt dat ya ai lam byin pru ai majaw htawng kaw nna lawt wa lu ai re, nga ai.

Cardinal Santos gaw 1947 ning hta Manila ning tau saradaw tai wa ai, 1953 ning hta Saradaw kaba tai wa ai, 1960 ning hta dai shaloi na wa sarabyin Yawhan XXIII a lata hta Cardinal tai wa ai, 1973 ning shi a asak 65 ning hta nnga mat wa ai re, nga nna Philippines Mungdan Kahtawlik Saradaw uhpung shiga dap kaw nna shana dat ma ai. 

 

Source : http://cbcpnews.net/

Add new comment

6 + 1 =