N Jaw, N Ang, N Galaw Ging Ai Lam Ni Hpe Gaw Jahtuk Shatsawm Galaw Ya Ai Lam Nlu Galaw Ai Nga Tsun Da Ai

Wa Sarabyin: N Jaw, N Ang, N Galaw Ging Ai Lam Ni Hpe N Hkam Sharang Ai Lam Kaman Madang Rai Yang Gaw Jahtuk Shatsawm Ya lam N Lu Ai Ngu Tsun Da Ai

 Reuter Shiga Dap na, Phil Pullella hte (5) lang ngu na hkrum shaga lamang (interview) hta, Wa Sarabyin Francis Shinggyim hkum shan sai kanawn ai lam (pedophilia)  hte seng nna, Nawku Hpung kawn, ladu lai jahprak gasat shalai ai masa hte rai yang gaw, dai hpe jahtuk sharai shatsam ya na gara hku mung n mai byin na re, ngu shadum da nga ai hpe July 8, bat manga ya shani Vatican kaw nna ndau da ma ai.

 Nawku Hpung kata hta ndai zawn rai nna, n jaw n htuk n ang n galaw ging ai lam ni hpe jahhprak gasat ai lam ni gaw, gawng ngwi ngwi rai, grau grau law htam wa ai. Daini na nhtoi ni hta, ndai mabyin ni hpe bai shabai la n lu ai masa hta hkawm nga ra ai.

 Reuters shiga dap hte hkrum shaga ai hta, “Nawku Hpung woi ningbaw ni gaw hkam sharang ya ai lam kachyi mi pyi n nga ai masa hku nna ndai masa hpe gasat shamyit na lahkam hkam taw nga ai. Raitim dai zawn galaw ai hte sha gaw shawng de lahkam lu na n rai nga ai, ngu Wa Sarabyin, shi a ningmu hpe tsun da ai.

Shading sharai shatsam la n mai ai gasat shamyit ai lam (Non-negotiable commitment)

 Shut shai ai lam ni hpe shadum sadi jaw jeyang ai hta hpagawn mara galaw ai  (tara hpe ladu lai jai lang nna ladu lai je yang ai, shing n rai, kaba ai mara hpe shayawm na hte kaji ai mara hpe shamat kau ya na malai, kaji ai mara hpe mara kaba shatai nna jeyang ai zawn re ai “အလွဲသုံးစားလုပ်မှု” ) hpe koi yan da ra ai.

 Mungdan lanagi hta tsa shadang (45%) daram gaw hpagawn mara galaw ai lam ni nga nga ai lam shi hte sa hkrum ai manam ni kaw na chye la lu ai majaw dai masa lam hte seng nna myit n pyaw ai lam Wa Sarabyin Francis matut tsun da ai.

 Ndai ram tsaw taw nga ai masat shadang hpe maram yu yang “dai zawn galaw ai masa gaw n tara ai maga de bai gale wa na re, ngu mung shadum da nga ai.

 N tara, n jaw, n ang, n htuk ai amu shagu gaw gaya kahpa rai nna, dai hpe shading sharai jahtuk la ra ai, ngu mung tsun da ai.

 “Jau langai mi hku nna, ngai gaw shinggyim masha ni galu kaba bawngrin wa hkra gaw sharawt ya ra ai, hkye la ra ai. Lama na ngai shanhte hpe n jaw n ang n htuk n tara ai hku shut ai rai yang, shanhte hpe sat ai hte maren sha rai nga ai; dai gaw, grai nan hkrit tsang hpa kaba rai nga ai” ngu nna ga shadawn hte tsun da nga ai.

 N jaw, n ang, n hkuk, n tara ai shut hpyi ai ni hpe myit galu kaba ai hte hkam sharang, shading sharai shakut nga ai Cardinal Sean O’Malley (Archbishop of Boston and President of the Pontifical Commission for the Protection of Minors, hte Wa Jau Andrew Small, OMI (the British-born Secretary of the Commission) yan a atsam marai dat shakut shaja nga ai gaw kasi la hpa rai nga ai ngu Wa Sarabyin Francis, shan hpe shakawn da nga ai.

 Hpang jahtum hta, Wa Sarabyin Francis, shi hkum nan Commission ni a mai kaja magam ni hpe n-gun jaw garum ya nga ai re lam tsun let Hpung shawa masha ni mung garum madi shadaw ya ga, ngu saw shaga da nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice