Myitkyina Zone Ramma Ni A Shawng Nnan Lang Na Myit Sumru Akyu Hpyi Hpawng Hte Praise & Worship Hpawng Galaw

Myitkyina Diocesan Youth Commission Kawn Woi Awn Let Myiykyina Zone, Catholic Ramma ni ashawng nnan lang na myit sawn sumru akyu hpyi hpawng hte Praise & Worship hpawng hpe September 03, 2022 ya shani Myitkyina Njang Dung na St. Paul Nawku jawng hta galaw la lu sai.

Ndai lamang galaw ai a yaw shada lam gaw ya  aten gaw,  anhte yak hkak taw nga ai aten mung rai, ramma ni mung jau ginwang shagu de shamu shamawt lam ni galaw taw nga ai raitim, Wenyi n gun atsam la na aten nau n nga ai, dai re majaw Ramma ni Wenyi n gun atsam la, Karai Kasang hpe shakawn kungdawn rai nna Wenyi n gun atsam rawt let matut hkawm sa lu na hpe madung yaw shada nna galaw ai lam rai nga ai. Dai shani na lamang hpe  jahpawt daw hta gaw  Shadau ginwang up Wa Jau La Sam hku nna Wenyi, myit masin n gun atsam jaw a talk lahkawng lang shang ya ai, shana maga daw hta gaw Karai Kasang hpe shakawn kungdawn ai Praise & Worship galaw nna Missa Hkungga hte shangut ai re lam ( DYC ) lit hkam Wa Jau Peter Bung Hku Lawt tsun ai. 

Dai shani sa lawm ai ramma langai mung daini na lamang hta sa lawm lu ai gaw grai pyaw ai, Wa Jau La Sam a mungga mung grai hkrak ai, ramma ni a matu matsing la mai na message ni grai lawm ai. ramma ni yawng sharawng shara rai kabu gara shang lawm ai hpe mulu ai. Hpang kalang bai galaw ai shaloi gaw chyum mungga hte la kap nna ramma ni a sha lam, sakse hkam ai lam ni hpe group hte group rai shawng de pru nna sakse hkam shangun ai lam ni bang ya jang grau kaja na re ngu mu mada ai nga nna shi ahkam sha lam hpe tsun dan ai.

Myitkyina Zone hta jau ginwang ( 8 ) nga ai rai nna, jau ginwang shagu na ramma ni marai ( 400 ) daram sa du shang lawm let myit ngwi simsa, kabu gara awng dang ai hte galaw la lu sai lam woi awn galaw ai ( DYC ) tsun ai kaw na chye lu ai.

Myitkyina Zone hta lawm ai jau ginwang ni gaw Tanghpre jau ginwang, Alam Bum jau ginwang, PLN jau ginwang, Shatapru jau ginwang, Myitkyina jau ginwang, Edin jau ginwang, St. Micheal jau ginwang, Shadau jau ginwang ni rai nga ai.

 

Shiga - Julia Ja Ing 

Add new comment

1 + 19 =