Myitkyina Sasana Ramma Ni Lak Lai Ai October Shata Akyu Hpyi Ai Lamang Galaw

October Akyu Hpyi Shata A Lam Hkrang Shala Lamang Sa Lawm Ai Ramma ni
Saturday, October 12, 2019
PDF: 
PDF icon ramma_ni_yawng_hpawng_let_lak_lai_ai_october_shata_akyu_hpyi_ai_lamang_galaw.pdf

11 October 2019, Myitkyina

Myitkyina Sasana, Ginjaw Ramma Komiti (DYC)  kawn woi awn let, Ramma Wuhpung uhpawng law law shang lawm ai Lak lai ai October shata akyu hpyi Nawku dawjau ai hte hkrum zup ai hpawng lamang hpe San Columban Nawku Htingnu Jawng wang hta galaw lai wa ma ai.

Nawku hpung a ningbaw Wa Sarabyin Francis kawn “Kashin Kamun hkam nna shangun dat ai ni’ ‘Baptized and Sent’ ngu ai ga baw hte ndai October shata hta lak lai ai Sasana majen je ai lam, akyu hpyi ai lam galaw na matu Mungkan ting na hpung masha ni hpe matsun dat ai hte maren, Myitkyina Sasana kata na Ramma wuhpung wuhpawng ni, Myitkyina Mare hte ni ai  Sasana Boarder shagu na jawng ma ni yawng hpe saw shaga nna ya na zawn rau sha Missa hkungga nawng akyu hpyi ai lam hte hkrum zup hpawng ai lamang hpe galaw ai re lam, chye lu ai.

“N dai October shata gaw, Nawku hpung kaw na sasana galaw ra ai shata ngu  masat da ai ga baw hte maren, anhte Ramma Komiti kawn woi awn let Sasana galaw ai lam re, tsan ai shara hkan na Jau ginwang shagu de mung ndai Extraodinary Month ngu ai laklai ai October shata, sasana majen je ai akyu hpyi ai lamang hpe galaw shakut na matu zuphpawng hta tsun htet da ai” nga nna ndai lamang hpe woi awn galaw ai Ginjaw Ramma ningbaw malai Morine Lasaw San Ra tsun lai wa ai.

Shawng daw na Missa hkungga Nawku daw jau ai lamang hta Myitkyina Sasana Sagurem wa Wa Saradaw Francis Daw Tang hte Ramma lithkam Wajau Saw Phoe Khawar, Msgr Francis Lum Dau hte Jau ni marai 8 shanglawm let DYC Band hpung ni a madun sum pyi ni hte rau Missa galaw nna, daw lahkawng ngu na lamang hta Mahkawn shakawn ai lam, ka manawt, hkrang shala ai lam hte October akyu hpyi ai lam hte seng ai gamung nau ra madun ai lamang ni hpe San Columban Jau Tai Boarder Jawng shawng kaw shana de 6:00 PM hta galaw lai wa ma ai.
Wa Saradaw Daw Tang hku nna 2019 ning gaw Nawku hpung a Sasana shaning re ai hte maren , ndai October shata hta Laklai ai hku nna akyu hpyi shakut ai lam hpa majaw galaw ai ngu ai lachyum, Sasana galaw ai, Akyu hpyi Nawku dawjau ai lam hta Ramma ni gara hku shanglawm shakut ra ai lam Mungga htawn tsun lai wa ai.

“Dai hpawng hta sa du shanglawm ai a marang e, Myikyina Saradaw Ginwang kata na Ramma ni grau nna rawt jat galu kaba wa na, Ramma ni shada da mu hkat chye hkat nna tinang atsam hpe madun let manu dan ai ramma ni byin wa lu na re ngu mu mada ai” nga nna Ramma Ningbaw malai Lasaw San Ra matut tsun lai wa ai.
Ndai hpawng hta Wai Maw, PLN, Shadau, Shatapru hte Myitkyina kata na ramma marai 720 ram hte Boarder up Mama ni, Sara/Saranum ni sa du shang lawm lai wa ma ai.
“Ramma ni hpe ndai zawn gethering galaw ya ai gaw, shan hte hpe grau nna myi hpaw shangun ai, chye chyang shangun ai lam ni lu ai ngu hpe mu ai, bai nna dai ni Ramma ni grai law hkra sa du shang lawm ai majaw Nawku hpung hta shamu shamawt ai lam ni grau masa hkrak ai wa ai , ndai zawn dingyang galaw yang, ya n lu sa du lawm ai ni mung mu wa nna shanglawm lu na re, shan hte hpe mung n-gun jaw ai lam tai ai” nga nna Waimaw, Shwe Nyaung Pyin kaw sa du lawm ai John Zung Dau tsun lai wa ai.
Myikyina Sasana Ginjaw Ramma (DYC) ni kawn masum ning hta kalang galaw ai Ramma Hpawng Kaba ( Youth Congress) hpe du wa na 2020 hta galaw na matu tau hkrau lajin nga sai hte maren, Ramma ni yawng hpe dai hpawng hta shanglawm lu na hkra shakut na matu saw lajin ndau shana dat ai lam mung galaw dat nga ma ai.

Thomas/ Seng Tu

Add new comment

8 + 10 =

Quick Links