Myitkyina Sasana Hta Deacon Nnan Langai Bai Lu Jat

Myitkyina Sasana,Tanghpre jau ginwang hta  Deacon nnan langai bai lu jat sai rai nga ai.

Brother Patrick Nawlang Zau Jat Aung gaw  December 04,2020 ya jahpawt  Tanghpre mare na Sumsing Lamu A Hkawhkam Jan Nawku jawng kaw Wa Saradaw Francis Daw Tang a lata hta Deacon aya hpe hkam la lu sai.

Deacon aya hkam la ai poi hpe  ya ten Covid-19 ana zinli chyambra na hpe tsang ra ai majaw  jinghku jingyu ni,nawku hpung masha ni law law hte rau wu wu di di rai nlu galaw ai sha,asuya  hkamja dap a matsun hte maren lamang ai hpe kadun dik ai  hku galaw awng dang la lu sai.

Deacon Patrick Nalang Zau Jat Aung A Labau Kadun 

----------------------------------------------------------------------

Deacon Patrick Nawlang Zau Jat Aung gaw 1990,June shata  23 ya shani,Hpakant ,Sai Wan lawk kaw  Salang Thomas Nawlang Zau Htoi Naw hte Jan Mary Shhingrai Ja Nu ( n nga mat sai ) yan kaw na shangai wa ai,kasha marai manga kaw na numbat masum ngu na la kasha kaba alat rai nga ai.Bai Jan Margaret Hkum Boi Roi Ja kaw na shangai wa ai kasha marai manang yawng kahpu kanau ni marai (10) rai nga ma ai.Dai hta na marai (3) n nga mat sai.

Jawng Lung Wa Ai Lam 

Tsang kaji daw hpe 1995-1999  du hkra Hpakant,Lapran tsang hpe 1999-2005 du hkra Alam lapran tsang jawng ni hta lung  la sai rai nna Ginwang up Wa jau Paul Lum Lai( n nga mat sai  ) a  madi shadaw ya ai hte Myitkyina Aungnan St.Columban jau tai jawng kaji de 2005,May 13 ya shani kaw nna 2008 nng du hkra sa nga let lahta tsang ( 10 ) hpe Myitkyina masat (3) lahta tsang jawng hta awng la lu sai.

2008 ning kaw nna 2013 ning du hkra Shatapru St.Patrick Intermediate jau tai dakkasu tau jawng hta hpaji sharin let Asuya  Dakkasu jawng hpe mung shangut la lu sai.

Brother tai na matu ( EEE) ngu ai English Entrance Exam hpe 2013,February shata hta awng la nhtawm May shata praw 1 ya shani Wa Saradaw Francis Daw Tang a lata hta Brother aya hpe hkam la nhtawm,jau tai dakkasu kaw 2013 - 2015 du hkra lahkawng ning myit sumru myit tau mang yu hpaji hpe sharin la sai.Bai wenyi hte seng ai ai lam, ( Spirituality ) hpe Taunggyi jau tai jawng kaw 2015 - 2016 ning hta shangut la lu sai.

2016 - 2020 March shata 16 ya shani du hkra jau tai na ni chye ra ai Theology ngu ai Karai hpaji hpe mali ning tup,awng dang ai hte shangut la lu sai.2020 ning hta Roma mung,(Urbaniana) dakkasu kaw na B.Th san poi hpe awng la lu sai.Daini December 04,2020 hta Wa Saradaw Francis Daw Tang a lata kaw Deacon aya hpe hkam la ai rai nga ai.