Myitkyina Saradaw Ginwang Kata, Wa Jau Ni A Hkum Ra Zuphpawng Hte Myit Sumru Akyu Hpyi Hpawng Hpe Galaw La Lu Sai Shiga

2021, November 26-December 22 lapran, Wa Jau ni a hkum ra zuphpawng hte myit sumru akyu hpyi hpawng hpe San Columban Cathedral Nawku Jawng Wang kata, Jau ni a dum nta hta angwi apyaw rai galaw la lu lam chye lu ai.

November 25 ya shani gaw Myitkyina Saradaw Ginwang na Councillor ni tau nau hpawng de zuphpawng galaw la let zuphpawng mahkren ga baw ni hpe shawng bawng ban sa wa ai re lam chye lu ai.

November 26 ya jahpawt jahpawt 7:00 am aten, Missa Hkungga hte zuphpawng hpaw hpang nna shana daw maga de zuphpawng hpe ginchyum dat shangut da ai. Bawng ban ai ga baw madung gaw 2021-2023 laman na mungkan Kahtawlik Nawku Hpung madang, Saradaw ni a Synod Zuphpawng hta tang shawn sa wa lu na sawk sagawn sa wa na lam ni hte seng ai rai nga ai. Dai shani daw dan da ai hta, Synod zuphpawng a matu lit la lam woi matsun sa wa na hpung (team) hpe mung hpaw da lu sai.

Dai hpung (team) malawm ni gaw

1. Fr. Peter Hka Awng Tu (Vicar General)
2. Fr. Joseph Gawlu Yung Wa (Chancellor)
3. Fr. Noel Jumhpawk Naw Lat (Member of CBCM Synod)
4. Fr. Joseph N Shang Hku Ja Yaw (Director of KMSS-Myitkyina)
5. Fr. Vicent Zinwa Shan Lum (Director of JPC)
6. Ram kaw na Ma Ma Langai
7. Tara Hkaw Sara Komiti kaw na langai

November 27 ya shani gaw Kahtawlik Nawku Hpung a lam woi ai npu hta shinggyim bawngring magam hpung, KMSS-Myitkyina (Karuna, Charity) kawn shanhte a magam bungli ni hpe tang madun ai lamang hpe galaw ai. Dai shani, KMSS-Myitkyina a ninghpum salang usa hte ningnan ni hpe mung shachyen ya ma ai.

Zuphpawng galaw nga ai laman, n myit mada ai, Wa Jau Kaba Paul Lasang La November 27 ya jahpawt, San Columban Cathedral Jau ni a dum nta hta Madu hta yup pyaw wa sai majaw shi a makoi mayam lam ni hpe mung, Nawku Hpung masha ni hte rau, Missa Hkungga nawng ya let makoi mayam laman ni hpe galaw ra ai majaw Wa Jau ni a hkum ra zuphpawng hte myit sumru akyu hpyi hpawng ni hpe galaw ai hta aten ni hkrak n lu galaw ai lam ni mung nga lai wa ai re lam chye lu ai.

Myit Sumru Akyu Hpyi Hpawng hpe gaw November 29-December 2 ya laman hta galaw lai wa ai rai nna, dai myit sumru akyi hpawng hta gaw Wa Sarabyin Yawhan Pawlu II a Apostolic Exhortation, “Pastores Dabo Vobis” matsun laika hpe jawm sumru garan kachyan hkat ai lam hpe madung galaw sa ai re lam chye lu ai.

“Pastores Dabo Vobis” laika gaw “dai ni na prat masa ni hta hkan nna Jau prat de shaga, lata la hkrum na hkrunlam hta Wa Saradaw ni, Wa Jau ni hte Nawku Hpung Masha ni kaw nna gara hku lam woi ningshawng tai ya nga ra ai hpe n-gun jaw lam woi ya na matu Sarabyin a matsun maroi laika rai nga ai.

By Fr. Patrick Gawmaw Hkawng Yae

#rvakachinservice