Myitkyina Saradaw Ginwang Kata Magam Gun Wa Jau Ni A Myit Sumru Akyu Hpyi Hpawng Hpe Cardinal Charles Bo Woi Awn Ya Ai

Shata Shagu galaw ai Myitkyina Saradaw Ginwang kata Sasana Magam Gun Wa Jau ni a Myit Sumru Akyu Hpyi Hpawng hpe January kru (6), bat masum (3) ya shani, Awng Nan, San Columban Cathedral kaw galaw ai hta Cardinal Charles Bo kawn woi awn la ya ai.

Wa Saradaw Francis hte rau Wa Jau ni dai myit sumru akyu hpyi hpawng hta, Covid – 19 makawp matsun hte maren hkan shatup let ahkum ara shang lawm ma ai.

Myit sumru akyu hpyi hpawng hta wenyi hpa-awn Cardinal Charles Bo, “Evangelii-Gaudium (EG)” a sharin shaga ai lam ni hpe “The Joy Of The Gospel In The Context Of The Rainbow” ngu ai ga baw hte garan gachyan ya ai.

Myanmar Mungdan gaw Theravada Buddhism makam hpung masha ni law malawng rai ma ai rai nna, amyu bawsang ni hta mung Bama myu sha ni law malawng rai ma ai.

Myanmar mungdan kata majan tsin-yam hkrum ai shaning mung matut manoi nga lai wa ai rai nna, 2013 shaning kaw nna gaw Democracy ngu ai prat de hkawm nga saga ai raitim, pat shingdang ai lam ni law law naw hkrum sha ra nga ga ai.

Dai majaw anhte myanmar mungdan hta sasana galaw ai anhte ni gaw myu, hpung, lusu, matsan n ginhka ai sha yawng hpe maren mara tsun shaga hku hkau kanawn matsun ra ai.

Grau nna, anhte myanmar mungdan kata hta makam hpung shada hku hkau ganawn mazum ai lam, matsan mayan ni hpe garum shingtau gaw sharawt ya ai lam, htunghking masa lam ni hpe mahkri shawn shangang shakang ai lam ni hta woi awn zinglum na anhte Sasana galaw ai ni a matu ahkyak dik magam ni rai nga ai.

Myikyina, manmaw, lashio saradaw sasana ginra ni hta miwa ni a ga-up lam ni law law hkrum sha nga ra ai. Hpyan yan camp law la ai saradaw ginwang ni rai nga ai. “Drug” nang hpam tsin-yam mung kaba nga ai.

Dai majaw “Dialogue with the poor” matsan jam jau nga ai ni hpe garum shingtau makawp maga, pawn ba la na gaw anhte a ginra ni hta grai nan ahkyak ai lam rai nga ai.

Marketing hte seng nna mung miwa mung hte rau japan, India, koria ni mung myanmar mungdan hta grai nan ga-up da nga ai.

“Church of the poor and church for the poor” Matsan ai ni jawn hpawng de ai Nawku Hpung gaw matsan ai ni a matu rai nga ra ai.

Madu Yesu hte tinang lapran hkrum shaga matut mahkai ai lam gaw Sasana galaw ai ni a matu grai nan ahkyak nga ai. Dai majaw ndai lam ni hpe galaw na matu Wa Sarabyin hkum nan aja awa n gun jaw da ai lam hpe mung Cardinal Charles Bo kaw nna matut tsun shadum ya ai.

Mayak mahkak lam amyu amyu a lapran, Madu a Kabu Gara Shiga hpe htawn tsawn shana lu hkra akyu hpyi ai lam hta, makam masha hka ja ai lam hta, nawku hpung a sharing shaga ai lam hpe hka ja ai hta, buga ginra masa, shinggyim lailen masa lam ni yawng hpe aten chyarang masat let man man shakut let Jau prat hte Karai Kasang hte, shi a myu sha ni hpe daw jau nga ga ngu 2021 shaning, Myitkyina Saradaw Ginwang kata, shata shagu galaw ai Wa Jau ni a myit sumru akyu hpyi hpawng hta n gun jaw shadum da ya ai lam RVA Jinghpaw Nsen Shapoi Dap kaw nna ndau ya dat ga ai.

Fr. Patrick Gawmaw Hkawng Yae

#rvakachin

#cardinalcharlesbo