Myitkyina Ramma Ni English Ga Hku Missa Hkungga Nawng Ai Lam Galaw Hpang

31.3.2019 (Sunday), Myiktyina

Myitkyina, San Columban Cathedral Nawku Jawng kaba hta jahpawt daw 10:00 Am na Ramma ni law malawng sa lawm ai Ramma  Missa Hkungga Nawku Daw Jau lamang hpe English ga hku galaw mat na rai nna, 2018 March shata 31 ya shani kaw nna galaw hpang sai lam chye lu ai.

Catholic  ngu ai gaw Mungkan ting langai sha rai nna, Mungdan langai hte langai Nawku Daujau ai ladat shai hkat ai lam nnga ai, Nawku Daw Jau ai hta jai lang tsun shaga ai ga hpan ni  sha shai hkat ai re majaw anhte Buga na Hpung masha ni, grau nna Ramma ni English ga hku Nawku Daw Jau ai lam hta hkau chyap let  akyang byin tai lu na matu yaw shada let galaw ai re lam chye lu ai.

Bai nna dai ning 2019 ning laman Sinpraw Dingdan Asia Mungdan ni rai nga ai Vietnam, Indonesia, Loas,Thai hte Combodia Mungdan hkan na Kahtawlik Ramma Ningbaw ni mung Myen Mung de sa du na lam nga ai, dai shaloi Myitkyina Saradaw Ginwang de mung saw shaga let Ginwang kata na Ramma ni  hte hkrum zup hku hkau kazawn mazum (Fellowship) lamang ni galaw na masing ni mung nga ai, dai hta sha n-ga, Asia Ramma Nhtoi (Asian Youth Day) hpe 2020 ning hta India kaw galaw ngut ai hpang gaw, Myen Mung kaw bai galaw ang na masa lam ni mung nga ai re majaw English ga hku Nawku Daw Jau ai lam hta Ramma ni grau hkau chyap let kungkyang ai ni byin tai wa lu na matu ya na zawn galaw ai re lam MDYC Ramma Hpa-awn Wajau Saw Pho Khwa tsun dat nga ai.

Ya nnan hpang daw hta mayak lam loi mi nga ai rai tim, du wa na ten hta grau htap htuk ai hku galaw lu na re ai lam, langai lang na English ga hku Nawku Daw Jau ai lamang hpe Ginjaw Ramma Comiti hte Myitkyina Jau Ginwang Ramma ni pawnghpawn woi galaw ai rai nna, du wa na lamang ni hpe Jau Ginwang Ramma ni kawn woi awn let, shata mi hta kalang galaw mat na re ai lam chye lu ga ai.

Langai lang na English hku Nawng ai Missa Hkungga Nawku Daw Jau lamang hpe Myitkyina Saradaw Ginwang Ramma Hpa-awn, Wajau Saw Pho Khwa nan woi awn nawng ya sai rai nga ai.

MPH