Myitkyina Jau Ginwang Kata Na Tsang (10) Awng Jawng Ma Ni A Hkaw Tsun Hpawng hte Shagrau Sha-a lamang Galaw

29 June 2019, Myitkyina

2018-2019 Hpaji Ladaw hta Myitkyina Jau Ginwang Kata Na Tsang (10) Awng sai Jawng ma ni a Dakkasu shachyen hkaw tsun hpawng hte shagrau sha-a lamang hpe 2019 June 29 ya shani, Aung Nan Nawku Jawng Kaba kaw galaw lai wa ma ai.

Dai lamang hta tsang 10 awng sai Jawng ma ni marai 100 jan sa du lai wa ma ai.Jawng Ma ni hpe  “Ramma hte sasana magam lam’ ngu ai ga baw hte Wajau Peter Bunghku Lawt Naw, “Ramma hte Makam Masham Lam” ngu ai ga baw hte  Sara John Htingnan Naw Ring hku nna hkaw tsun gam garan lai wa sai hte, Dakasu Hpaji hkaja lam hte Major lata la ai lam hte seng nna  Dr.Peter Lahkang Doi Awng kawn ningmu jahpaw hkaw tsun lai wa sai lam chye lu ai.

Dai hpang chyeju dum Missa hkungga hpe Ginwang Up Wajau Dr.Peter Hka Awng Tu woi awng nawng jau ya nna, matut manoi rai tsang (10) awng sai ni yawng hpe kumhpa shagrau ai lam galaw lai wa sai rai nga ai.Ningtawn ai hku awng ai ni hpe mung laksan laika sumbu (Gumhpraw) kumhpa shagrau hkrum ma ai.

Myitkyina Jau Ginwang kata hta 2018-2019 hpaji ladaw hta tsang 10 awng ai marai 181 tup rai nna, sharin hpang manga hta ningtawn ai 5D (၅ ဘာသာ ဂုုဏ္ထူး) lu ai marai lahkawng, 4D lu ai marai lahkawng, 3D marai langai, 2D marai mali hte 1D marai 9 ningtawn ai hku awng la lu sai lam chye lu ai.

Lai wa sai shaning 2017-2018 hpaji ladaw hta Myitkyina Jau Ginwang kata na tsang (10) awng ai marai 200 jan nga  ai lam chye lu ai.

Thomas