Myit Shuk Ai, Myit Bra Ai Lam Ni Nnga Ai Sha Madu Yesu Jaw Ya Na Kabu Gara Ai Lam Hpe Hkap La Lu Na Matu Anhte A Myit Masin Salum Hta Shara Lajang Da Nga Gaa, Nga Nna Wa Sarabyin Tsun Dat Nga Ai Shiga

Myit shuk ai, myit bra ai lam ni nnga ai sha Madu Yesu jaw ya na kabu gara ai lam hpe hkap la lu na matu anhte a myit masin salum hta shara lajang da nga ga, nga nna Wa sarabyin Francis tsun dat nga ai. December 15, Adventu ladaw 3 ngu na laban shani San Peter pa kaba hta hpawng nga ai shawa hpawng hpe tsun shga mungga hta ya na zawn Wa sarabyin tsun dat ai lam rai nga ai.

Wa sarabyin tsun ai hta, “Mungkan hte seng ai lam ni hpe chyu myit let nrau nhtau shamu shamawt galaw nga ai hku nna anhte a myit ni myit shut myit bra ai lam ni nbyin ngacga, anhte hpe shi a kabu gara ai lam jaw ya mayu nga ai Madu Yesu a matu anhte a masin salum hta shara jaw lu hkra lajang nga ga, myit malai let anhte a masin saslum hpe lajang shachyip ai lam ni galaw na matu Yawhan Baptista shadum nga ai, Madu Yesu shadum sharin nga ai lam mung ndai myit malai na lam sha rai nga ai. Shagrit shanem ai, Karai kasang gaw shi a tsawra matsan dum lama ai myi man hpe Madu Yesu hta anhte hpe shadan shadawng ya nga ai, madun shaleng ya nga ai, ngu ai lam hpe hkap yin la na matu saw shaga da hkrum nga ai ni anhte rai ga ai” ng anna Wa sarabyin tsun shadum dat nga ai.

Myit yawn myit malai ai lam hte seng nna wa sarabyin matut tsun ai hta, “Adventu ladaw, ‘Du sa ai ladaw’ ngu ai gaw shaman chyeju law law lu la mai ai aten rai nga ai, ‘Karai kasang hpe kam sham nga ai ngu ai hte sha nram ai, shani shagu anhte a prat hpe shachyoi shapra la na matu mung ra ahkyak ai’ ngu ai lam hpe shadum ya ai aten mung ndai Adventu ladaw rai nga ai. Ndai Adventu ladaw hta anhte ala dingda nga ai wa gaw madat pyaw ai mau mwi langai langai hta na masha langai ngai hpe nrai, anhte hte rau shanu nga nna mai kaja ai lam hta hkawm sa na matu anhte hpe shadum shadut nga ai Madu karai nan rai nga ai. Dumsu ushat wa kang hta galeng nga ai Ma chyangai Yesu a myit man hta yak hkak jam jau hkrum nga anhte a hpu nau ni a myi man, matsan mayan masha ni a myi man hpe mu mada lu nga ai, ndai masha ni gaw shanhte a ka-ang hta Madu shanu nga ai ngu ai lam hpe hkap yin la lu ai ni rai nga ma ai zawn, Madu Yesu shangia wa ai mung sung lam hpe shaleng madun ya na matu Karai kasang e ra sharawng ai ni mung rai nga ma ai” nga nna Wa sarabyin tsun dat nga ai lam Vatican shiga dap kaw nna shana dat nga ai.              

Source -Vatican News