Mying Kaba Ai Shara Rai Nga Ai Tanghpre Mare Na Nawku Hpung Sun Wang Hpe Makawp Maga Na Matu Gaw Gap Masing Galaw Hpang Nga Sai

Jinghpaw Mung a manu dan la ai shara langai rai nga ai Tanghpre mare na nawku hpung sun wang hpe makawp maga na matu Tanghpre jau ginwang na Kawa La Hpung ni lit la nna gaw gap masing hpe galaw hpang wa sai lam chye lu ai.

Sun wang hpe makawp maga na matu wan wut hpang ai hku nna jau ginwang kata na dinghku de sai kawa la ni yawng marai mi gumhpraw lap ( 5000 ) hpra jawm bang na masing hte sun wang hkyen shatsawm ai, namsi namsaw hpun ni hkai hpang sai rai nga ai.

Yaw shada lam gaw ndai lamu ga kaw nna langu hpun hte namsi namsaw ni tsawm htap hkra hkai na,Tanghpre mare gaw mying kaba ai shara rai nga ai hte Nu Maria poi zawn re ai poi kaba ni galaw ai shara re majaw manam jarawk hte Wut sawk galaw na shara Retreat Center ni gaw gap sa wa na masing nga ai lam Tanghpre jau ginwang a kawa la hpung ningbaw Slg.Nka Zau Nan tsun dan ai kaw na chye lu ai.

Shara shagu hkan nga taw ai shiga madat ni mung nawku hpung sun wang makawp maga ai gaw gap masing hta shang mai byin ai made shang lawm garum na matu mung saw shaga da nga ai.

Alu ja gumhpraw hte shang lawm garum mai ai zawn namsi ban lu ai ni rai yang namsi ban ni hpe garum la mai ai lam garum hpyi dat nga ai.

Lamu ga sun wang hpe makawp maga ai gaw Wa Sarabyin a matsun rai nga ai Laudato si hpe hkan shatup ai lam mung rai nga ai.