Myi Nmu Ai Hpu Nau Ni Computer Hte Mobile Phone Hpe Myen Ga Hku Mai Lang Sai

 By:Thomas

Myen mung hte Vietnam Mungdan  na hpaji ninghkring ni jawm pawng let, Smartphone hte Windows Computer ni kaw na Myen hku ka da ai laika ni hpe hti dan ya lu ai Computer matsun (Myanmar Text to Speech Engine Software) hpe galaw shapraw da lu sai lam chye lu  ai.

Myanmar Mungdan na myi nmu ai hpu nau ni law malawng gaw English ga, English laika hte ladat hpaji  kungkyang ai ni n law ai re majaw Talkback ngu ai English ga hku nsen shapru hti dan ai hpe madat nna Smarth phone Computer  lu lang ai ni n law nga ma ai.

Dai zawn re ai  dingbai dingna hpe laidi lu na matu Myen mung hte Vietnam Mungdan  na hpaji ninghkring ni kawn, Smarthphone hte computer ni kaw na Myen laika ni hpe hti dan ya lu ai Computer matsun (Myanmar Text to Speech Engine Software) hpe awngdang ai hku galaw shapraw dat lu manu ai.

Myanmar Text to Speech Engine Software hpe Windows Computer hte Android Smartphone ni kaw bang nna Myen hku ka da ai laika hte  internet laika man ni hpe nsen shapraw hti dan shangun ai ladat hte Myen mung na mi nmu ai hpu nau ni Computer, Smartphone mai lang sai lam Myanmar ATC (Myanmar Assistive Technology  Research and Development Team) kaw na Team Leader Rosner La Hkun tsun ai hte maren chye lu ai.

“Myanmar TTS Windows Version hpe 2017 shaning htum maga kaw nna nsen bang hpang ai, Myen laika ga hkum (30000) jan ram lawm ai, Myen ga kaw lang ai ga hkring ga sa ni hpe Yangon hte Mandalay Computer Dakkasu, Natural Language Processing Lab kaw na  Professor ni garum la ai. 2019 January 17 ya shani ndai computer matsun software hpe lu shapraw hpang ai hku re.Windows version kaw na nsen hkrang hte maren 2019 May shata 15 ya shani kawn Android version hpe Google Play Store kaw na garan dat lu ai hku re “ nga nna tsun lai wa ai.

Ndai software hpe Myen mung kaw na hpaji ninghkring ni rai nga ai Salang Rosner La Hkun, U Win Shwe hte rau Vietnam Mungdan Sao Technology Center kaw na hpaji ninghkring ni kawn pawng hpawn let galaw shapraw da ai re lam, U Win Shwe gaw shi hkum nan mung myi nmu ai wa rai nna hpaji ladat lam hta grai ningtawn ai wa re ai lam chye lu ai.

Rosner La Hkun gaw myi n mu ai hpu nau ni a matu ladat hpaji, jak hpaji ni  galaw shapraw ai lam hta kungkyang ai shadang sha rai nna Yangon, Myitkyina hte Mai Ja Yang hkan nmyi nmu ai ni hpe computer sharin ya nga ai wa re ai lam chye lu ai.

“Lai wa sai ten, NVDA Screen Reader, Braille Translator, English-Myanmar Typing Tutor ni hpe Myen hku galaw shapraw lu hkra galaw lai wa sai, Text to speech application hpe Develope galaw ai lam, Myanmar Currency Converter ni galaw ai hta mung team member hku nna shanglawm galaw lai wa ai, matut nna mung Money Reader for The Blind ngu ai myi n mu ai ni gumhpraw mai hti ai baw computer matsun software hte Online Computer Training Platform ngu ai Internet lam yan hku nna hpaji amyu myu hpe sharin la na hkrang ni hpe mung galaw shapraw lu na matu shakut nga ai “ nga nna Sara La Hkun tsun lai wa ai.

Myi n mu ai ni hkrum sha taw nga ai dingbai dingna mayak lam ni hpe ladat hpaji Technology lang nna laidi koi yen lu na matu computer matsun software ni  matut manoi galaw mat na re ai lam chye lu ga ai.

Man Htauk ngu ai pat hpe ahtawk nna lang ra ai  Touch screen lata lang Smartphone ni hpe myi nmu ai ni lu lang na matu nmai byin nga ai.Dai hpe myit sawn chye na lu ai hpaji ninghkring ni kaw nna talkback ngu ai lata hte ahtawk dat ai laika yan ni hpe nsen shapraw ga shaga ya ai ladat hpe galaw shapraw dat ma ai. Dai majaw, myi hte yu nna lang ra ai touchscreen phone kaw na laika yan ni hpe dip dat ai hte, nsen shapraw hti dan shangun nna na hte madat ai ladat hte myi nmu ai ni prat dep smart phone hte Computer ni hpe lu lang wa nga ma ai rai nga ai.

Myanmar Text to Speech Engine Compute matsun software hpe Android phone kaw na lang mayu ai ni gaw, Google Play Store kaw SM Myanmar TTS ngu gayat bang tam la nna mai lang sai lam, Windows Computer kaw lang mayu ai ni www.myanmaratc.org ngu ai website kaw na download jahkrat la mai sai.Software hpe lang ai ladat ni hpe mung Facebook laika man www.facebook.com/myanmaratrd  kaw shang hti la mai ai lam chye lu ai.

Npu na sumla - Myanmar Text to speech Engine Software