Myen Hpyen Dap Ni Nawku Jawng Hpe Gap Ru Bun Ai Majaw Kathawlik Hpung Masha Marai Mali Si Mat Ai Shiga

Myanmar Hpyen Dap Ni Nawku Jawng Hpe Gat Ru Bun Ai Majaw Kathawlik Hpung Masha Marai Mali Si Mat Ai Shiga

May 24, bat langai ya jahpawt daw, Kayah mungdaw, Kayanthayar Jau Ginwang na Yesu A Salum Ningsang Nawku Jawng Wang de, Myanmar Hpyendap kawn amyawk (tauhpau) laknak ni hte gap ru bun ma ai lam chye lu ai.

Mung shawa masha hpyen la ni (Karenni People’s Defense Force, PDF) hte Myanmar Hpyen hpung ni majan gasat ma ai majaw, Kahtawlik hpung masha ni Yesu A Salum Ningsang Nawku Jawng Wang kata machyu nga ma ai rai nna, Myanmar hpyan hpung ni kawn dai shara de amyawk (tauhpau) lanak hte gap ru bun ma ai majaw Kahtawlik Nawku jawng kaw machyu nga ai masha ni hta na Kahtawlik hpung masha marai mali si mat ai re lam chye lu ai.

Hkala nba hkrum ai ni yawng mung Kahtawlik Hpung masha ni sha rai ma ai lam chye lu ai. Hkala hkrum ai masha marai matsat (8) re ai lam buga masha ni tsun dan ai hta chye lu ai. Irrawaddy Shiga hta Myanmar Hpyendap ni dai si mat sai ni a hkum tsawp ni hpe la makoi kau ma ai lam mung tsun da ma ai.

Nawku Jawng a nta magaw hte numgaw madin ni yawng hten mat ai rai nna, Nawku Jawng kaw shakap da ai wudang mung hten mat ai lam chye lu ai.

Majan bying nga ai majaw, kun dinghku (60) daram re ai 300 a hta de nga masha ni Nawku Jawng kaw yen machyu nga ai shaloi byin ai re lam chye lu ai.

Nawku jawng kaw hprawng yen machyu nga ai ni ya na zawn Myanmar hpyendap kawn amyawk kaba ni hte gap ru bun ma ai majaw yawng bai hprawng ayai mat ra ma ai lam, Nawku jawng ni hte Ginwang Up Jau dung jawng wang ni, bai Ma Ma Jawng ni hta hprawng yen machyu nga ai masha hkying kaba rai nga sai lam, Loikaw Saradaw Ginwang na tsun shaga ahkang lu ai Wa Jau Soe Naing UCA Shiga Dap de tsun shana da nga ai.

Nawku Hpung kawn shinggyim nau na myit masa hte garum shingtau ya ai lam hpe hkyak hkyak galaw nga sai raitim, hpyen majan grau laja wa ai rai nna, hpyen yan masha ni law jat wa ai majaw tang du garum shingtau lam hpe gaw n lu galaw ai, ngu Wa Jau Soe Naing UCA Shiga Dap de matut tsun shana da nga ai.

Myanmar Mundan Kata Majan Bying Nga Ai Shara Ni

Hkristan masha law malawng nga ai mungdaw ni rai nga ai Karen, Kachin, hte Chin mungdaw ni hta mung majan byin nga ai rai nga ai. Myanmar Hpyendap kawn Jet nbungli ni hte amyawk laknak kaba ni hte mung gasat taw nga ma ai majaw ndai mungdaw ni hta hpyen yen yen hkawm ra ai masha jat hta jat rai nga ai. Kachin Mungdaw hta Kahtawlik hpung masha wan 1.7 nga ai rai nna dai hta na hpyen yen masha ni rai ma ai masha 116,000 daram gaw tinang dum bai wa nga magang sai raitim, ya na zawn mung masa n pyaw wa ai hte majan ni bai bying nga ai majaw hpyen yen bai yen hkawm ra ma ai.

May 24 ya shani du hkra rai yang Myanmar Hpyendap kawn mung shawa masha marai 824 sat kau sai lam Assistance Association for Political Prisoners (AAPP) hte NGO ni a matsing hte maren chye lu ai.

Kachin, Chin, Karen hte Kayah ni gaw Myanmar Mungdan hta mungdaw lu ai amyu bawsang ni rai ma ai. Dai mungdaw ni hte dai amyu bawsang ni gaw Hkristan masha ni law malawng rai ma ai.

Mungdan jarit mayan a htam masum hta na htam mi daram hpe mungdaw na wunpawng myu sha ni e up hkang ai shara ni rai nna, Myanmar Hpyandap kawn dai Wunpawng Myu Sha Hpyen Hpung (Shanglawt Hpyen Hpung) ni hpe gasat nga ai rai nga ai ngu Vatican a ningmu hpe mung tsun da ma ai.

Myanmar mungdan gaw 1962 – 2011 shaning du hkra Myanmar Hpyendap Asuya e up hkang lai wa ai rai nna, shinggyim ahkaw ahkang hpe tawt lai ai lam law law shut lai wa ma ai. 2010 shaning kaw nna mung masha ra lata ai Asuya ni up hkang na lahkam de sit shang wa ai hta, 2015 shaning kawn gaw lai wa sai shaning du hkra Aung San Suu Kyi woi awn ai NLD Asuya ni woi awn up hkang lai wa ai rai nga ai. Ra Lata poi hpe bai awng da ai raitim, Myanmar Hpyendap kaw mungdan daru magam hpe February 1 ya shani kaw nna zing la kau ya ai hkrum ai majaw ya na zawn mung masa lam hta laja lana bying jat hta jat rai taw nga ai.

Myanmar mungdan Simsa Rapra ai Democracy mungdan lawan lu la mung ga akyu ja ja hpyi nga ga.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-05/myanmar-catholic-church-attack-military-four-dead.html