Myanmar Mungdan Simsa Lam A Matu Akyu Hpyi Ga Ngu Wa Sarabyin Saw Shaga Da

May 2, Laban shani, Wa Sarabyin Francis gaw ndai May shata “Prayer Marathon” ngu ai gabaw hte Rosary hti akyu hpyi na rai nga ai hte maren Myanmar mungdan simsa lam a matu mung yaw shada let akyu hpyi ya nga ga nga nna nawku hpung masha yawng hpe saw shaga da nga ai.

Chyam bra ana hkoi zim mat na matu mung May shata Rosary akyu hpyi ai hta shalawm ga nga nna mung saw shaga da nga ai.

Myanmar Mungdan Hpyen Dap kawn February 1 ya shani kaw nna mungdan daru magam ra lata awng ai ni nkau hpe rim la nna, mungdan daru magam up hkang aya hpe mung zing la kau ai hpang mungdan kata simsa lam n nga ai gaw ya du hkra rai nga ai.

Shimlam la mying hte mung shawa masha ni hpe rim zing, tara jeyang, gap sat ai lam ni matut nga ai majaw ya na zawn May shata na akyu hpyi ai hta Myanmar Mungdan simsa lam lu wa na matu Wa Sarabyin Francis kawn saw shaga da ai rai nga ai.

Ya du hkra rai yang mung shawa n-gun madun ai hta sat hkrum ai n law htum 759 rai sai lam mung Vatican Shiga Dap kaw nna ndau da ma ai.

“Anhte yak hkak ai aten hte ra kadawn ra ahkyak ai aten hta anhte a kanu ni kaw n htang wa ga ai. Ndai shata hta Myanmar Mungdan simsa lam lu nna, prinem htingram lam hta hkawm sa wa lu na atsam hkam la lu mu ga yaw shada let anhte a sumsing kanu kaw akyu hpyi htinglu htinglai ya nga ga,” ngu Wa Sarabyin Francis saw shaga da ai rai nga ai.

By Fr.Patrick Hkawng Rae