Myanmar Mungdan Ra Lata Poi Shiga

November shata praw 8,2020 lai wa sai laban shani gaw Myanmar Mungdan a Party hkum Democracy ra lata poi galaw ai nhtoi rai nga ai.

Jahpawt hkying 6:AM ten kawn sindan pa ngu ai “Me” bang na ginra ni hpaw ai hte rau Sindan pa sa bang ai Mung shawa masha ni dingren tsap let mae sa bang lai wa ma ai.

Mungdan ra lata poi komiti kawn mae bang ai aten hpe jahpawt hkying 6:00AM kawn shana hkying 4:00PM du hkra sha masat da ai raitim, nkau shara ni hta shana jan du ten du hkra sindan pa sa bang ai ni nga ai lam chye lu ai.

Covid-19 kap bra ana hkrit tsang ra ai lapran hta galaw ai re majaw, Covid-19 ana hpe tau hkrau makawp maga ai ladat ni hte maren  masat da ai tara ni hte hkrak rai nna mae  bang ai lam galaw ma ai.Kaga yak hkak ai lam dingbai dingna  hpa nnga ai sha Ra Lata Poi hpe Myanmar Mungdan ting awngdang ai hku galaw la lu ai lam chye lu ai.

Ya na zawn ra lata poi hpe awngdang ai hku lu galaw ai gaw, Ra lata poi kamiti ni lit la galaw ai lam masan sa ai majaw raitim, Mung shawa masha ni n-gun mi alu rai Mae sa bang ai, kahpran galang rai shanglawm ai majaw re ai lam, Myanmar Mungdan hpaji jaw ninghpum Salang Awng San Su Kyi kawn Myanmar Time shiga dap de tsun da ai lam chye lu ai.

Ra lata poi shang party ni kaw na National League For Democracy ngu ai Daw Awng San Su Kyi woi awn ai NLD party ni gaw, Mungdaw hte  Ginwang kaba law law hta Ra Lata Poi dang ai lam shiga ni hta mu hti lu nga ai.

UEC ngu ai Union Electon Commission, Munghpawng Ra Lata Poi komiti ni kawn tara shang ndau shana ai lam hta, Hkang Mungdaw, Kayar Mungdaw, Mandalay Ginwang Kaba, Tanintharyi Ginwang Kaba, Yangon Ginwang kaba, Pago Ginwang kaba hte Ayarwaddy Ginwang kaba ni hkan na ra lata ginra ni hta NLD Party  Rapdaw Dat Kasa ni dang ai lam ndau shana da nga ma ai.

Jinghpaw Mungdaw na ra lata poi mahtai hpe tara shang ndau shana ai lam nnga shi ai raitim, Ra Lata Masat Ginra law malawng hta NLD Dat Kasa ni dang ai lam chye lug a ai.

 Kachin Pawnghpawng Party, KSPP kaw na, Njang Yang Masat (1) Mungdaw Rapdaw shara hta shang shingjawng ai Dr.Manam Tu Ja, Njang Yang Masat (2) Mung Shawa Rapdaw shara hta shang shingjawng ai U Lama Naw Awng, Sumpra Bum Masat (2) shara hta shang shingjawng ai U Nshang San Awng hte Momauk Mare, masat 1 Mungdaw Rapdaw shara hta shingjawng ai U Sut Nawng ni marai mali gaw ra lata poi awng ai lam chye lu  gai.

Ra Lata Poi Mahtai hte seng nna, Myanmar Mungdan ting hta gara party ni dang ai ngu ai mahtai hpe tara shang ndau shana ai lam nnga shi ai re.

NLD Party dat kasa  ni rai nga ai ya na Jinghpaw Mungdaw Asuya Hkringmang Daju Dr.Hkyet Awng hte kaga hkringmang salang marai 6 mung dai ning 2020 ning na ra lata poi hta matut dang ai lam chye lu ga ai.

Source :mkn news journal, mmtimes