Myanmar Mungdan Ngwi Pyaw Simsa Lam Hte Prinem Htingram Lam A Matu Seng Ang Ai Ni Hpang De Asia Dan Na Cardinal Ni hte Saradaw Ni Hpyi Shawn Laika Shapraw

Myanmar Mungdan Gumsan Magam hte ra lata awng ningbaw ningla ni hpe lai wa sai February 1, 2021 ya shani hta Myen Hpyendap kawn mungdan up hkang aya zing la kau ya ai majaw mung shawa masha ni ra sharawng lam hpe shapraw ai mung shawa n-gun madun ai shata lahkawng ram du wa sai rai nga ai.

Asia Dan Saradaw Ni A Hpawng Daju “Federation of Asian Bishops’ Conferences” (FABC), March 19, 2021 ya shani Myanmar Mungdan ngwi pyaw simsa lam hte prinem htingram lam de seng ang ai ni lahkam sa wa na matu n-gun jaw hpyi shawn dat ma ai lam dai shani htuk shapraw ai ndau laika hta tsun da ma ai.

Myanmar Mungdan kata hta daini na aten byin nga ai mabyin masa ni hpe na la mu la nga nna myit yawn myit tsang myit n pyaw hkam sha lawm ma ai lam dai ndau laika a ga hpaw hta tsun da nga ai.Myanmar Mungdan hta n-yun bu, masin pawt ai lam grai kaba taw sai. Dawsa ai lam, gumsheng ai lam grai kaba taw sai. sai jahkaw ai lam nau law taw sai. Machyi kaba hkrum ai lam nau law taw sai. Ndai lam ni mung simsa lam ra sharawng ai ni a myit hkrum galung kahkyin gumding ai hte shang lawt ai ahkaw ahkang myit masa a majaw galaw shakut ai ni hpe dawsa ai, gumsheng ai ni a zingri zingrat ai lam ni rai nga ai, ngu nna mung madi madun da ma ai.

Dai zawn zingri zingrat ai lam ni hpe n galaw na matu mungdan law law hte, wuhpung law law hpyi shawn da ai lam mung kahtap kahtap nna rai nga sai.

Hyendap hte Balik dap ni ya na zawn Dawsa ai lam, gumsheng ai lam n galaw na matu United Nations Security Council kaw nna mung myit hkrum nsen langai hte sha shadum hpyi shawn da sai.

Wa Sarabyin Francis mung simsa rapra lam hte prinem htingram lam de hkawm sa wa na matu kahtap kahtap nna hpyi shawn da sai.

The Association of South East Asian Nations (ASEAN) kaw nna mung Myanmar mungdan masha ni prinem htingram lam bai lu la na matu seng ang ai ni man hkrum hkrum shaga ai (Dialogue) ladat hte hkawm sa na matu hpaji jaw hpyi shawn da sai.

“Anhte Asia Dan na Cardinal ni mung shanhte hte rau seng ang ai hpyendap, mung masa lam galaw ai ni, mung shawa n-gun madun ai mung shawa masha ni, makam hpung hpa-awn ni hte nawku hpung masha ni yawng Simsa, Simsa, Simsa nga lu na matu lam tam sa wa na hpe hpyi shawn dat ga ai. Simsa lam hpe yawng lu la mai ai. Dai simsa lam gaw grai nan mung ahkyak dik ai,” ngu Asia Dan na Cardinal yawng ta masat sen htu da ai ndau laika “statement” hta tsun da ma ai.

Man hkrum bawng ban jahkrup lam hpe lawan ladan galaw nna mahtai tam sa wa na matu mung n-gun jaw da ma ai. Myitkyina kaw Ma Ma langai mi lam ntsa na laknak lang hpyenla ni hte Balik ni a shawng kaw hput di let hpyi shawn taw ai mabyin sumla gaw mungkan ting hpe shadum shana ya ai sumla nan rai sai.

“Anhte chye ai Myanmar mung shawa masha ni gaw simsa lam hpe ra sharawng ai ni rai ma ai. Rawt jat galu kaba lam hpe ra sharawng ma ai rai nna, rawt jat galu kaba lam a matu ahkaw ahkang hpe tam shakut nga ma ai. Mungdan tara, shinggyim lailen tara ni hte maren sadi maja let nga chye ma ai hte daru magam lu ai ni hte rau magam gun chye ma ai. Ya ten hkyak hkyak ra kadawn taw nga ai prinem htingram lam lu la na lam tam ma ai hte dawsa ai, gumsheng ai lam htum mat na matu sha ra sharawng nga ma ai,” ngu matut tsun sang lang da ya ma ai.

“Asia Dan gaw simsa ai mungdan, myit mada lam nga ai mungdan, kun dinghku masha ni mahku mahkau kaba ai mungdan rai nga ai. Anhte yawng gaw kun dinghku masha ni hkrai rai nga ai. Anhte yawng gaw nanhte hpe garum ya mayu ga ai. Raitim, dai nanhte mungdan nta masha ni yawng hpang ra ai. Simsa lam gaw lu la mai ai” nga nna mung n-gun jaw da ma ai.

Asia Dan na Cardinal ni yawng gaw Myanmar mungdan na Cardinal Charles Bo hte mung rau rai nga ai lam, mungdan masha ni hkam sha taw ai hkra machyi ai lam hpe mung rau hkam sha lawm nga ai lam, ndai chyam chya yak hkak taw ai masa lam kaw nna lawan  dik ai hku mahtai tam la lu na matu Karai Kasang kaw akyu hpyi ya nga ai lam,  dawsa ai, gumsheng ai lam ni gaw galoi mung mahtai n re sha n ga, hten run lam she re lam, dai gaw grau ai machyi kaba hpe jaw ai she re lam, Myanmar mungdan simsa lam lu na matu shanhte hte rau akyu hpyi na lam, ni hpe mung matut hpyi shawn saw shaga da ma ai.

Ndau laika “statement” a hpang jahtum hta Kanu Nu Maria mung Myanmar mungdan masha ni hte anhte ni yawng hpe garum ya u ga matu shi kaw kam hpa myit kaba hte akyu hpyi htinglu htinglai na matu shadum n gun jaw da nga ai.

By Fr. Patrick Gawmaw Hkawng Yae

file:///C:/Users/DELL/AppData/Local/Temp/FABC-12-Cardinals-Appeal-to-Myanmar-for-Peace-19-Mar-2021.pdf