Myanmar Mungdan Kata Ra Lata Poi Awng Asuya Hpe Hpyendap Kaw Nna Daru Magam Zing La Ai Lam Hte Seng Nna Kahtawlik Nawku Hpung Shiga Shapoi Dap Law Law Hta Mung Ndau Da Ma Ai

Union of Catholic Asian News (UCAnews) Shiga Dap hta “Coup fears in Myanmar after military questions poll result” ngu ai ga baw hte ndau da ma ai.

Ya na zawn Hpandap kaw nna daru magam zing la ai masa lam gaw Myanmar mung shawa masha ni hpe hkrit tsang shangun ai lam kaba re ai lam shadum sadi jaw da ai rai nga ai.

Ya na zawn hpandap kaw nna daru magam zing la ai mabyin gaw a shawng hta sha Myanmar mungdan Kahtawlik Sasana Hpa-awn Cardinal Charles Bo gaw makam hpung ningbaw ni yawng hte hkrum shaga nna Mungdan simsa lam hte Mung masa lam hta htingram prinem lam nga wa na matu hkyak hkyak bawngban lai wa sai rai nga ai.

Makam masham hpung hpa-awn ni yawng gaw mungdan ningbaw ningla ni hte hpyendap magam gun ni lapran prinem htingram lam hta hkawm sa let simsa ai hte galung kahkying gumding nga na matu n gun jaw ai hte dai hku galaw na lit mung nga ai lam shadum da ma ai rai nga ai.

“Anhte a teng man labau hpe mu la sharin la nna sakse hkam let shatsawm jahtuk lu hkra shakut mu. Teng man ai mabyin masa hpe hkap la let simsa lam hpe tam ai ga. Shada hkrum shaga nna prinem htingram ai lam la ai hta myit marai bang let simsa lam hpe tam sa wa ga” ngu January 25 ya shani htuk shapraw ai Makam Hpung Hpa-awn ni a laika hta lawm ai lam UCA Shiga Dap kaw nna ndau da ya ma ai.

Vatican Shiga Dap kaw nna mung “Myanmar army seizes power in military coup” ngu ai gabaw hte Febuary 1 ya shani ndau da ma ai.

Myanmar mungdan hta hpyendap up hkang na matu daru magam hpe hpandap kaw nna zingla ai lam rai nga ai. Dai zawn zing la ai hta democracy masa lam hte mung shawa masha ni ra lata poi hta lata da hkrum sai Asuya ningbaw ningla ni hte rau Aung San Suu Kyi hpe mung rim zing la sai ngu ka da ai.

Mungdan shagu na ningbaw ningla ni mung ndai lam hte seng nna hpandap ni hpe shadum sadi jaw ai lam ni galaw da ma ai lam nga ai. Mung shawa masha ni ra lata nna Asuya ningbaw tai wa na ni hpe bai dat ya na hte shanhte lu la ang ai daru magam arawng aya bai ap jaw na matu mung hpyi shawn da ma ai lam Vatican Shiga Dap kaw nna mung ndau da ya ma ai.

https://www.ucanews.com/news/coup-fears-in-myanmar-after-military-questions-poll-result/91196

https://www.vaticannews.va/en/world/news/2021-02/myanmar-army-coup-aung-san-suu-kyi-overthrown.html