Myanmar Mungdan Hta Simsa Lam Hte Tara Rapra Lam Nga Wa Na Hpe Wa Sarabyin N gun Jaw

Myanmar Mungdan hta Mung Shawa masha ni ra lata da ai Gumsan Magam hte Mungdan Ningbaw Ningla ni hpe bai shalawt dat ya na matu hte dawsa lam n nga ai mung shawa n-gun madun ai ni a shinggyim ahkaw ahkang hte seng nna, lai wa sai bat manga (5) ya shani UN kaw bawngban jahkrup ai lam galaw hpang wa sai rai nga ai.

Wa Sarabyin Francis mung Myanmar mung shawa masha ni hte ni ni htep htep rau rai nga ai lam tsun let mayak mahkak lapran dawsa ai lam kata re ai simsa ai ladat hte hparan sa wa na matu n-gun jaw da ai.

Mung shawa n-gun madun ai masha marai manga hta lai nna n mai hpawng ai ngu hpyendap kaw nna tara upadi jahkrat da ai raitim, mungdaw shagu na mung shawa masha ni dai n tara ai tara hpe upadi hpe ninghkap ai hte mung shawa n-gun madun ding yang rai nga ai.

Shana hkying matsat (8) kaw nna jahpawt hkying mali (4) du hkra lam ntsa n mai pru ai tara, masha rim sakse laika ni n lawm tim rim mai ai tara, zawn re ai hpyendap Asuya tara ni hpe mungdan madang tara upadi jahkrat da ai gaw anhte mung shawa masha ni a shinggyim ahkaw ahkang ni hpe tawk lai ai tai nga ai.

Mung shawa masha wan hku shawa n-gun madun ai n’htoi mung na wa magang, mung shawa masha law wa magang rai nga ai.

Ndai n’htoi ni hta Wa Sarabyin Rung kaw na hpung woi hpa-awn ni myit masin kraw lawang kaw nna nan hkam sha lawm nga ai lam, Myanmar Mungdan simsa wa u ga hte teng man tara rapra lam nga wa u ga matu ja ja akyu hpyi ya nga ai lam, lai wa sai 2017 shaning hta Myanmar Mungdan de sa gawan ai aten hta Myanmar mungdan gaw galu kaba magang wa ai hpe mu mada lai wa ai lam, wenyi lam hta Myanmar mung shawa masha ni hte rau rai nga ga ai lam ni tsun let n-gun jaw da ai.

Myanmar mungdan hta February 1 ya shani, mung shawa masha ni ra lata nna mungdan gumsan magam uphkang hpung byin tai wa na NLD party ningbaw ningla ni hpe hpyendap kawn zing hkang la kau ai majaw, ya na zawn mung shawa masha ni n tara ai lam hpe ninghkap shawa n-gun madun ai hpe laknak lang, laknak kam hpyendap Asuya ni a dawsa ai lam ni mung matut manoi nga taw ai rai nna mungdan n sim n sa ai lam grau grau kaba wa ai ngu mung masa lam masam maram ai ni tsun da ma ai.

Shinggyim ahkaw ahkang hte seng nna yu reng nga ai UN Human Rights Council kaw nna ndau ai hta lai wa sai bat manga ya shani du hkra rai yang mung masha marai 350 lahta de rim la hkrum sai lam chye lu ai. Ndai zawn rim la hkrum ai masha law malawng gaw shana yup tung aten ni hta tinang a dum nta kaw rim na sakse laika n lawm ai sha rim la hkrum ma ai lam chye lu ai.

Man Hkrum Hkrum Shaga Ai Lam Hte Shinggyim Sari Sadang

Anhte a Saradaw Kaba Cardinal Charles Bo hte Myanmar Mungdan Kahtawlik Saradaw Hpung (CBCM) a “Statement” ndau laika hta Cardinal Charles Bo kawn seng ang ai ningbaw ningla ni hpe shadum n-gun jaw da sai hte maren “The Holy See” kaw nna mung “Ya na mayak mahkak lam hpe hparan lu na matu gaw shinggyim sari sadang nga ai man hkrum hkrum shaga jahpra hparan la na gaw akyu pru akyu jaw dik ladat re ai” ngu Archbishop Jurkovic mung madi madun n-gun jaw da ai.

Teng man dinghpring ai hte tinang hkum tinang jaw ang dum ai masha gaw kadai hte raitim, gara masa hta raitim, gara shara kaw raitim, man hkrum hkrum shaga bawngban gwi na rai nga ai.

Malawm marai 47 hte UN Human Rights Council zuphpawng hpe lai wa sai February 12, bat manga ya shani Myanmar mungdan hte seng nna bawng ban jahkrup ai lam hpe galaw ngut sai rai nna, Miwa hte Russia hta lai nna mungdan shagu myit hkrum lawm ai lam chye lu ai. Dai re majaw UN Human Rights Council kaw nna daw dan ai lam gaw law grau ai myit hkrum lam hpe madung da myit let Myanmar mungdan simsa lam hte tara rapra lam a matu garum sa wa na lam mung chye lu ai.

Raitim, Myanmar Mungdan Gumsan Magam ahkang aya hpe zing la da ai Hpyendap Asuya kaw nna UN hte EU hte bawngban jahtuk sa wa na hpe n hkap la lu ai lam shiga bai nhtang da ai lam chye lu ai.

Myanmar Mungdan gaw lai wa sai 1962 shaning kaw nna 2011 shaning du hkra Hpyendap Asuya up hkang ai npu kaw jam jau lai wa yu sai rai nga ai majaw mung shawa masha ni Hpyendap Asuya hpe ja ja ninghkap shawa n-gun madun nga ai mung rai nga ai ngu nna mung, mung masa masam maram ai ni sawk sagawn madun nga ma ai.

February 7, laban shani, Wa Sarabyin Francis, San Peter pa kaw, “Madu A Lamu Kasa Akyu Hpyi” ngut ten, Myanmar mung shawa masha ni hte rau rai nga ai lam, mung shawa masha ni a akyu ara matu teng man tara rapra lam hte simsa ai masa lam hpe bai hkam la lu mu ga democracy lam hta hkawm sa na matu n-gun jaw da ai.

Hpang shani hta mung Myanmar mung shawa masha ni hte ni htep ai hku nga nga ai lam hte mung shawa masha ni hte rau hkam sha lawm nga ai lam sumtsan dakkasa magam gun ni hpang de laika shagun dat ai lam chye lu ai. Democracy lam hte hkawm hpang wa ai mung masa lam hpe ya na zawn Hpyendap kaw na makru daw jahten kau ai lam gaw myit htum lam kaba rai nga ai nga nna mung tsun da ai. Myanmar Mungdan gumsan magam hte rau mung masa ningbaw ningla ni yawng hpe bai dat ya na  myit mada nga ai lam, seng ang ai ni mungdan akyu ara matu madung da yaw shada let man hkrum hkrum shaga bawngban sa wa ai gaw kaja dik mahtai tam ai rai na re nga nna   Wa Sarabyin Francis February 7 ya shani hpaji jaw shadum da ai lam Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/vatican-city/news/2021-02/holy-see-myanmar-jurkovic-un-rights-council.html