Myanmar Mungdan A Gawda Tara Hta, Hpung Magam Gun Ni, Ra Lata Poi Nmai Bang Ai Ngu Ai Tara Hpe Shaprai Kau Ya Na Matu Cardinal Charles Bo Hpyi Lajin Dat Ai Shiga

Myanmar mungdan hta, daining htum wa maga de, bai galaw na rai nga ai Ra Lata Poi galaw na matu lajang shajin taw nga sai rai nga ai. Mung masa galaw nga ai ni a matu, Ra lata poi langai mi sha raitim, mung chying sha ni a matu gaw, mungdan kata hta, shing gyim sari hte hkrat yawng a matu akyung rawng, rawt jat galaw kaba wa lu na matu hkawmsa ra na, hkrun lam langai rai nga ai.

Rai timung, Mungdan Gawda Tara (392) hta, Catholic hpung magam gun, Saradaw, Jau ni, Mama ni, Buddha hte Muslim hpung magam gun ni hpe Ra Lata Poi, (Me-Sindan Pan) bang na matu pat hkum da ai rai nga ai.

Ngai Cardinal langai hku nna, mung chying sha ni yawng (Me-Sindan Pa) bang na matu tsun shadum lu ai raitim, ngai hkum nan bang na ahkang nlu nga ai. Ndai lam gaw, lak lai ai lam langai mi rai nna, Democracy Mungdan ni a naw ra rawng ai lam hpe n myit dum ai lam mung rai nga ai, nga nna matut tsun da nga ai.

Ja n-sam, hpring nga ai Myanmar mungdan hta, mung chying sha ni a matu gaw, sari sadang hte hkrak, yawng a matu mai kaja magam hta shang lawm na ahkaw ahkang lu nga ning len, ndai ahkaw ahkang hpe lale kau ai ni gaw, tinang hta lit nga ai hpe dum chye ra nga ai.

Makam masham htung hking ni hte hpring zup nga ai mungdan kata na mung chying sha ni hpe, nawku hpung ningbaw ni hku nna gaw, myit masa hte makam masham lam hpe sha lam woi awn ya lu ai rai nga ai. Dai majaw, ngai hku nna gaw, dai Party hpe, dai ningbaw hpe (Me-Sindanpa) bang u ngu nna gaw, ntsun mayu n-ngai. Rai timung, anhte hpung woi ningbaw ni hku nna gaw, mungchying sha ni hpe, tinang manu shadan, ra sharawng ai, ningbaw hpe (Me-Sindan Pa) bang na matu shadum jahprang na gaw, lit nga ga ai re, nga nna tsun dat nga ai. 

#churchnews

#rvakachinservice