Myanmar Mungdan  Mare Kaba Ni Hta Hpyen Gumshen Ninghkap N-Gun Madun Ai Lam Dingyang Matut Galaw Nga

Myanmar Mungdan hta lai wa sai Frebruary praw 1 ya shani Hpyen Dap kawn Mungdan Uphkang Daru Magam Arna Zingkau ai majaw dai hpe ninghkap ai hku nna Mung masha ni ladat amyu hte n-gun madun ai lam galaw nga ma ai re.

Simsa ai hku n-gun madu nga ai Mung masha ni hpe balik hpyen dap kawn bru shabra kau ai lam ni nga ai rai tim hpyen dap asuya uphkang ai hpe n ra ai hte mung masha ni ra sharawng ai tengman ai Federal Democracy Mungdan lu na matu byin mai ai ladat hte matut n-gun madun nga ma ai rai nga ai.

Hka jaw poi ngut ai ten hta n-gun madun ai lam kachyi mi zim ai mat ai raitim, April 24 ya shani Myanmar Mungdan manghkang hte seng nna  Asean Ningbaw ni hkrum zup bawngban hpawng galaw na hkyen ai ten hte zuphpawng ngut ai ai ten ya dai ni du hkra Yangon, Mandalay, Mawlamyaing, Myitkyina, Hpakant hte Sagaing Ginwang  hkan Masha n-gun law law hte n-gun madun nna ningnan hpaw da ai NUG ngu ai National Unity Government, Amyusha Myitrum Asuya hpe madi shadaw ai ginla marawn nsen Slogan ni lang let Taw Lan Yae awng dang hkra galaw na nga nna Ramma ni matut n-gun madun nga ma ai.

Balik Dap kaw nna mung n-gun madun ai ni hpe dingyang hkan jahtaw shabra ai lam ni, rim ai lam ni matut nga ai rai nna ndai April shata laman rim hkrum ai masha jat wa ai lam chye lu ai.

Hpang jahtum lu ai shiga ga hta Hkang Mungdaw Mindat Mare hta April shta 26 ya shani Mung masha ni hte Myen hpyen hpung ni gasat gala byin ai majaw Myen hpyen la marai 15 ram shi hkrum ai lam Hkang  Shinggyim Ahkaw Ahkang Wuhpung (Chin Human Rights Organization) CHRO kawn ndau da ma ai.

Mindat kaw hpyen mawdaw langai wan hkru ai majaw hpyen la marai 10 ram si mat nna hpyen n-gun garum sa ai mawdaw ni hpe mung Mare masha ni lam kaw ninghkap gasat ai lam galaw ai nga nna bbc shiga hta ka da nga ai.

Kaga Myen hpyen la marai 5 gaw Mare kata gasat ai hta si mat ai lam tang madun da ma ai. April shata 26 ya shani N-gun madun ramma marai 6 hpe Hpyen Council Dap kawn rim ai ten kaw nna ya na zawn shada gap gasat ai lam byin ai rai nna dai ni April 27 jahpaw hkying 9 ram hta mung matut gasat nga ai lam chye lu ai.

Myanmar Mungdan hta Hpyendap kawn Ana Zing ai hpang April shata 26 ya shani du hkra, nhtoi 84 ya laman balik ni kawn Mung shawa masha ni hpe dawsa jahtaw kau ai hta si hkrum ai masha 751 hte rim hkrum ai masha 3431 rai sai hte matut nna rim na matu warrant htuk da hkrum ai masha mung 1000 mi jan nga ai lam chye lu ga ai.

Mung Hpan