Myanmar Mung Shawa Masha Ni A Shinggyim Ahkaw Ahkang Dip Da Hkrum Ai Prat

Vatican Shiga Tsun Ai Myanmar Mung Shawa Masha Ni A Shinggyim Ahkaw Ahkang Dip Da Hkrum Ai Prat

  Myanmar mungdan kata mung shawa masha ni a shinggyim ahkaw ahkang dip da hkrum ai ngu United Nations na shinggyim ahkaw ahkang hpaji ninghkring ni sawk sagawn nna UN Human Rights Council de March 11, bat mali ya shani, tang shawn da ma ai hpe Vatican Shiga Dap kaw nna ndau da ya ma ai.

  “Myanmar mungdan na mung shawa masha ni mungkan wuhpung shagu a garum shingtau ya na hpe hkyak hkyak ra taw nga sai. Ga, shing n rai, statement hte sha n rai sai, ya ya jang nan, tatut hkrang shapraw let garum ya ra sai,” ngu the United Nations Special Rapporteur on the Situation of Human Rights in Myanmar kaw nna mungkan ting hte seng ai hpe yu reng nga ai UN Human Rights Council de tang shawn da ya ai lam lawm nga ai.

  Special Rapporteur, Thomas Andrews madi madun ai hte maren UN Security Council kaw nna bat masum ya shani shapraw ai sadi jaw ndau laika “statement” gaw Myanmar mung masa lam hpe ahkyak la ai lam, dawsa ai lam ni hpe n galaw na matu hte Democracy mung masa lam de hkawm sa na lam ja ja shadum shadut da ma ai. Dai lam ni hpe galaw na matu n-gup a ga hte sha tsun taw ai gaw tang du akyu n pru sai ngu Thomas Andrews tang shawn da ai.

  Shimlam la nga ai Myanmar hpyendap hte balik dap ni gaw masha sat ai amu, rim nna hkyuk htawng bang ai amu, zingri zingrat ai amu hte kaga dawsa ai lam ni hpe shara shagu hta galaw nga masai lam, mung shawa ni ra sharawng ai lam hpe hpyi shawn ai shawa n-gun madun shagu masha hpawng garan ayai mat hkra zai ai ladat hte jahte tam jahten nga ma ai lam ni hpe prat dep ramma ni ladat shaw nna social media ni hta mara da ai hpe maram yu yang nan Myanmar mungdan kata shinggyim ahkaw ahkang hpe tawk ai hpyendap hte balik dap ni hta dawn dawng nga ai ngu Vatican Shiga Dap kaw nna ndau da ma ai.

  Bat mali ya shani hta sha Myanmar mungdan shimlam dap mying la da ai ni kaw nna mung shawa n law htum marai 70 daram hpe masha sat amu tawt lai ma ai lam, dai marai 70 hta na ka-ang hkup lahta na masha ni gaw asak 25 ning lawu na “Generation Z” ramma ni rai ma ai lam, February 1 ya shani kaw nna hpyendap kawn mungdan gumsan magam ahkaw ahkang hpe zing la ai rai nna, ya du hkra rai yang mung shawa masha 2,000 lahta de rim la hkrum sai lam, dai masha ni hta tinang dum nta kaw shanu nga ai ten rim la hkrum ai ni mung lawm ai lam ni hpe Special Raporteur, Thomas sawk sagawn tang shawn da ai hpe mung ndau da ma ai.

  Myanmar mungdan gaw n tara ai hku masha sat amu ni galaw nna mung shawa masha ni hpe jahkrit sama zing hkang ai lam ni galaw nga sai lam, lai wa sai aten hta mung Rohingya myu sha ni hpe myu shamyit masha sat amu mung matut manoi byin nga ai lam, 2020 shaning tup hta mung shimlam la hpyendap hte balik ni masha sat amu galaw lai wa ma ai majaw n law htum Rohingya masha 33 sat hkrum sai lam ni hpe matut tang shawn ya ai lam mung ndau da ma ai.

  Hpyendap kawn mungdan gumsan magam ahkang aya hpe zing la ai hpang Myanmar mungdan kata shanu nga ai amyu bawsang masha ni hpe shanhte a dum nta ni hta sa rim la ai lam ni mung nga wa ai. Ndai mabyin masa ni gaw dan len nga ai. Hpyendap ningbaw ningla ni lawu na hpyen ma ni hte wuhpung ni hpe upadi tawt lai ai ru hka amu ni galaw na matu shadut shagyen ai lam ni nga ai. Masha sat ai, masha mat mat ai, zingrit zingrat ai, rim ai, hkyuk htawng sharawng ai. Dai zawn re ai masa hta Myanmar mung shawa masha ni dumbri dumbra rai wa ai. Ndai mabyin ni yawng gaw gumhpawng mungdan tara hte nhtan shai nga ai ngu Un special Papporteur matut tang shawn da ai.

  UN-Women “UN Amyu Shayi Hpung” ni kawn mung, Myanmar mungdan hta byin nga ai mung masa lam hte seng nna UN Human Rights Council de tang shawn ai lam galaw da ma ai ngu Vatican kaw nna matut ndau da ya ma ai. Shanhte a tang shawn ai hta, Myanmar mung shimlam la ngu tsun jahpai ai hpyendap hte balik dap ni sat kau ai mung shawa masha ni hta myu shayi n law htum 6 na lahta de rai sai lam, marai 600 daram gaw jahkrit shama hkrum, rim la hkrum ai hta lawm nga ai lam ni mung tang shawn da masai lam ndau da ma ai.

  Myanmar mung shawa masha ni simsa ai hku hpawng de let hpyi shawn mayu ai lam ni hpe hpyi sawn na ahkaw ahkang nga ai hpe hkap la ya na hte dai zawn hpawng de hpyi sawn ai myu sha ni hte mung shawa masha ni hpe jahte tam rim la, zingri hkrum hkrum ai ni a shinggyim ahkaw ahkang hpe manu shadan ya ra ai lam UN-Myu Shayi magam gun hpa-awn UN-Women Executive Director, Phumzile Mlambo-Ngcuka kawn mungdan gumsan magam zing la ai hpyendap hpe sadi jaw shadum dat ai lam hpe Vatican Shiga Dap kaw nna ndau da ma ai.

Source: Vatican News