Mungkan Ting Hta Gap Hkat Majan Jahkring Na Matu “Dawsa Dingsa Ai Lam Hkum Nga Ga” Mungkan Masat Dingsat Nhtoi Hta UN Kaw Nna Bai Shadum Da Ai

“Dawsa Dingsa Ai Lam Hkum Nga Ga” Mungkan Masat Dingsat Nhtoi hpe India mungdan shang lawt lu hkra woi awn lai wa sai Mahatama Gandhi a shangai nhtoi ang ai, October 2 ya shani hta galaw lai wa ai.

“Dawsa Dingsa Ai Lam Hkum Nga Ga” mungkan masat dingsat nhtoi hpe 2007 June 15 ya shani na UN Gerneral Assembly shani masat shagrin da ai re lam chye lu ai.

Mahatma Gandhi a shangai nhtoi hpe la nna “Dawsa Dingsa Ai Lam Hkum Nga Ga” mungkan masat dingsat nhtoi hpe masat da ai re lam ya na UN Secretary-General Antonio Guterres kaw nna sang lang da ai.

Mahatma Gandhi gaw shinggyim ahkaw ahkang hte seng nna shakut shaja lai wa ai wa rai nga ai. Shi gaw masha yawng hpe makawp maga ai hta bung pre ai ahkaw ahkang lu hkra shakut lai wa sai hte shinggyim wuhpung wuhpang kata simsa lam hpe rau gaw de, rau hkam sha lu hkra shakut lai wa ai wa rai nga ai majaw shi a kasi kamang hpe la let shinggyim ahkaw ahkang hte simsa lam lu hkra shakut nga lu na matu re ai lam mung matut shang lang da ai.

2020 shaning na matu “International Day of Non-violence” “Dawsa Dingsa Ai Lam Hkum Nga Ga” a shiga madung gaw hpyen majan gasat ai lam hkum nga ga! Yawng a hpyen rai nga ai Covid 19 ana kanu ni hpe sha rau jawm gasat ga!, ngu ai shiga rai na re ngu Guterres ndau da ai.

“Chyambra ana zingli tsin-yam hkrum ten hta awng dang taw ai wa langai sha nga ai; dai gaw ana kanu hkum nan rai nga ai; dai majaw chyambra ana kanu hpe shazim kau lu na matu mungkan shara shagu na gap hkat majan hpe jahkring da ga”, ngu mung shadum da ai.

Gap hkat majan jahkring ai rai yang gaw jam jau ai lam, hkra machyi kaba nga ai lam ni hpe shayawm kau lu na, hpang jahtum hta shamat kau lau na re majaw simsa lam hpe ra sharawng ai ni gaw gap hkat majan hpe daining na shaning jahtum hta jahtum da saga ngu mung shadum da ai.

Shada n kam n tsen ai lam ni law taw nga ai majaw mungdan nkau ni hta dingsa ai lam ni naw nga nga ai. Mungdan ningbaw ningla ni, makam masham hpa-awn ni hte shinggyim matut mahkai hpung ni yawng shi a saw shaga ai hpe na lu nna hkan nang hkan sa na hpe myit mada ai ngu nna mung tsun da ai.

Kahtawlik Nawku Hpung na Wa Sarabyin Francis mung UN ningbaw tsun ai “gap hkat majan jahkring na lam hpe madi shadaw ai.

“Shinggyim nau na shada garum shingtau lam hpe gaw gap lu na matu hte n gun yawm nga ai ni, matsan mayan re ai ni hpe bau sin makawp maga lu na matu, shada n ju n dawng ai lam ni hkum nga ga, ngu March 29, laban shani na “Madu Lamu Kasa Akyu Hpyi” ngut ten Wa Sarabyin shadum da lai wa yu ai.

Chyambra ana zingli hpe jawng gasat shamit kau ga, ngu mung Wa Sarabyin Francis saw shaga da nga ai. N hkrum nra ai lam ni gaw shinggyim masha ni hta ra kadawn nga ai lam ni hpe jahkum shatsup sa wa lu na n rai nga ai. Shada myit hkrum myit ra galum kahkying gumding lam chyu gaw shinggyim masha ni hta ra kadawn ai lam ni hpe jahkum shatsup ya lu na re ngu Wa Sarabyin tsun da ai.

Ndai shiga hpe Vatican Shiga Dap kaw nna ndau da ma ai hpe RVA Jinghpaw Nsen Shapoi Dap kaw nna bai ndau dat ya lu nngai. Chyeju kaba sai!

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/world/news/2020-10/united-nations-nonviolence-day-guterres-message.html