Mungkan Shara Shagu,Kun Dinghku Hte Seng Ai Lam Vatican Kaw Nna Matut Mahkai Bungli Galaw Sa Na Lam

Mungkan Shara Shagu, Kun Ding Hku Hte Seng Ai Lam Hpe Vatican Kaw Nna Matut Mahkai Bungli Galaw Sa Wa Na Shiga

Mungkan shara shagu na kun dunghku hte seng ai hpe Vatican kaw nna matut mahkai bungli jau jawm galaw sa wa na na re lam August 7, bat kru ya shani, Vatican Shiga Dap kaw nna ndau da ma ai. Dai masin gaw 2022 shaning na Mungkan Kun Dinghku zuphpawng ngut ai shani du hkra rai na re lam chye lu ai.

“Catholic Global Compact on the Family” ngu tsun da ma ai gaw Vatican kaw nna kun dinghku hte seng ai ga shaka lam ni hpe galaw hpang sa wa na re lam ndau da ai rai nga ai. Dai zawn galaw hpang sa wa ai hta Nawku Hpung a shinggyim lailen hte seng ai sharing shaga ai “Social Doctrine of the Churc” a sharin shaga ai hte maren hkrak galaw sa wa na re lam tsun da ma ai.

  Masin masa hpe gaw “the Vatican Dicastery for the Laity, Family and Life (DLFV) kawn bat manga ya shani htuk shapraw da ma ai lam, dai gaw Wa Sarabyin Francis ndau da ai  “Tsaw ra kun dinghku prat a kabu pyaw lam” ngu lachyum nga ai latin ga hte “amoris Laetitia Family” english ga hte “the Joy of Family love” rai nna, dai ga baw ginlam hte maren, masin jahkrat galaw sa wa na re lam chye lu ai. Ndai daw dan ai lam hpe Italy mungdan, Milan na the International Ceter of Family Studies (CISF) hta bawng ban da sai hte maren DLEV hte the Pontifical Academy of Social Sciences (PASS) kaw nna ndai lam hpe shawng de ndau da sai re lam chye lu ai.

 “Amoris Laetitia (the Joy of Love)”, tsaw ra ai a kabu pyaw lam ngu ai ga baw ginlam gaw Wa Sarabyin Francis, “on the beauty and joy of love in the family”, tsaw ra kun dinghku a kabu pyaw lam hte tsawm htap ai lam ngu ai ga baw hte n-gun jaw shadum jahprang ai hpe lakap nna la da ai re lam mung chye lu ai. Ndai hpe kun dinghku hte seng nna Saradaw ni a Synod zuphpawng kaba hpe 2014 hte 2015 shaning na October shata hta numdaw lahkawng rai nna galaw ngut ai hpang 2016 shaning, March 16 ya shani htuk shapraw lai wa sai re lam mung chye lu ai.

2021 March 19 ya shani gaw dai “Amoris Laetitia Year” hpe ndau ai (5) ning hpring masat dingsat hpe galaw lai wa sai re lam mung chye lu ai. Dai shani hta, Wa Sarabyin Francis gaw, 2022, June 26 ya shani hta (10) lang ngu na kun dinghku zuphpawng kaba hpe Roma hta bai galaw sa wa na re lam ndau hpang da sai rai nga ai.

 Dai majaw “the Catholic Global Compact on the Family” ngu ai, lai wa sai bat mali ya shani, lata da ai ga baw ginlam hte seng ai lamang ni hpe dai zuphpawng kaba shangut na shawng kaw tang madun sa wa na re lam mung chye lu ai.

 “Amoris Laetitia Family Year” hte seng ai lamang ni hpe matut manoi galaw sa wa lu na matu lai wa sai June 9-12 ya shani ni hta, “Where are we with Amoris Laetitia?”

 “Tsaw Ra Ai A Kabu Gara Lam Hta Anhte Gara Shara Kaw Nga Taw Ai Rai?”, ngu ai ga baw ginlam hte bawng ban lai wa sai rai nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice