Mungkan Sasana Ma Nhtoi (World Children’s Day)

Daini na Sasana Ma ni gaw hpawtni na myit mada shara ni rai ma ai. Shawng lam myit mada shara hte kaja grau ai prat hpe gaw de sa wa lu na matu masin jahkrat hparan sa wa na gaw anhte a kaba la ai lit magam rai nga ai.

2021 shaning a November 20 ya shani gaw, UN kawn masat shagring hpang ai kaw nna, (60) ning hpring Mungkan Sasana Ma Nhtoi (World children’s day) masat dingsat nhtoi rai nga ai.UN kawn, 1959, November 20 ya shani, Sasana Ma ni a ahkaw ahkang hte seng nna ndau hpang lai wa ai rai nga ai.

“The United Nations Convention on the Right of the Child” ngu ai mungkan mungdan hte seng ai shinggyim ahkaw ahkang hpe 1989 shaning hta bai ndau lai wa sai rai nga ai.1990 shaning kaw nna, UN kawn, shaning shagu a November 20 ya shani hpe Mungkan Sasana Ma ni a nhtoi ngu masat let, Sasana ma hte seng ai zuphpawng kaba galaw nna ndau shabra ai lam ni hpe mung dai shani hta ndau shabra ma ai rai nga ai.

UN kawn, shaning shagu Mungkan Sasana Ma nhtoi masat dingsat hku nna ga manoi, ga baw ginlam hte rau sasana ma hte seng ai machye machyang lam ni hpe mung ndau ya ma ai.

Mungkan Sasana Ma Nhtoi hpe anhte hpa rai galaw ga ai rai?

Sasana Ma Nhtoi gaw mungkan madang hku nna Sasana ma ni hpe shagrau sha-a na matu hte shanhte hpe makawp maga, garum shingtau lam woi, lam matsun madun sa wa na matu, bai nna shanhte a matu magam bungli ni hpe galaw gun hpai na matu hte dingbai dingna kaw nna shalawt ya na hte, teng man jaw ang ai hpaji machye machyang ni hpe sharin achying sa wa lu na matu gakaw ai rai nga ai.

Ndai kabu pyaw ai sasana ma ni a nhtoi hta, shanhte a matu malu masha ni lajang ya ai, sumla hkrung yu lakmat lajang ya ai, kumhpa sak jaw ai, ginsup rai ni hpe mari ya ai, bai, ma ni kabu pyaw let myit ngwi myit pyaw lam lu la na lamang ni hpe galaw ya ai gaw grai nan ahkyak ai hte akyu rawng ai mung rai nga ai.

Nawku Hpung kata, bai hpaji jawng ni hta, mare/ lawk ni hta, wuhpung wuhpawng ni hta shanhte a matu ga shaga shingjawng ai, ginsup shingjawng ai, mahkawn mangoi shingjawng ai hte laili laika shingjawng ai lamang ni hpe galaw ya ai gaw grai nan manu htap htuk dik ai rai nga ai.

Kanu kawa ni, bai ma ni hpe yu lakawn ai ni mung Ma ni hpe lam woi lam madun sharin shaga ya let katsi kamang tai na machye machyang hte shanhte ma ni a shinggyim ahkaw ahkang, hkam ja lam, hpaji lam hte seng ai ni hpe hka ja la mai nga ai.

“Sasana Ma shagu gaw kanu a hkritung kaw nna nan shanhte hpe hkap tau hkap hkalum, makawp maga garum ya na ahkaw ahkang lu la ging nga ai,” ngu Wa Sarabyin Francis hkum nan tsun shadum da nga ai.

Kanu Kawa, Sara/sara num ni, tsi shara/ sara num ni, Mungdan Asuya daru magam up hkang ai ningbaw ningla ni, wuhpung wuhpawng hta woi awn zinglum nga ai ni, Makam hpung ni hta hpa awn tai nga ai ni yawng gaw shinggyim matut mahkai lam media mahkrun lam hku nna mung, rau hpawng de ai hku nna mung, sasana ma ni a ahkyak ai magam lam ni hpe rau ta gindun let myit hkrum mang rum rau jawm shakut nna lamang ni hpe galaw sa wa na grai nan ra ahkyak nga ai.

Sasana ma ni gaw shanhte hpe lam madun sharin shaga ai, katsi madun ai hpe chye chyang la loi ma ai. Shanhte a Sasana ma prat mahkrum madup hpe matsing la loi ma ai. Lawan ladan galaw sa wa lu ma ai. Dai majaw gaw anhte ni shanhte hpe atsawm akawm rai nna sadi maja let bau kaba sharin shaga sa wa ra ai.

Mungkan Sasana Ma Nhtoi gaw anhte hpe shadum nga ai: Sasana ma ni gaw hpaji sharin hkaja sa wa na ahkaw ahkang nga ai, lam magup hta sharin shaga makawp maga lamwoi hkam la na ahkaw ahkang nga ai, Anhte buga, anhte ginra, anhte wuhpung wuhpawng, anhte a mungdan, anhte a mungkan, anhte a nawku hpung shawng lam myit mada shara gaw dai sasana ma ni hta rai nga ai.

Ngwi Pyaw Ai Mungkan Sasana Nhtoi rai u ga, ngu shakram let RVA English Website hta November 15 ya shani shapoi da ai hpe RVA Jinghpaw Nsen Shapoi Dap kaw nna shalai ndau shapoi dat ga ai.

By Fr. Patrick Gawmaw Hkawng Yae

#rvaenglishwebsite #rvakachinservice

RVA