Mungkan Ramma Nhtoi Poi Kaba Shang Lawm Na Matu Philippines Mungdan Ramma Ni Shajin Nga

January 22 kaw nna 27 ya shani du hkra Panama Mungdan hta galaw na rai nga ai Mungkan Ramma nhtoi poi kaba shang lawm na matu, Mungdan shagu na Ramma dat kasat ni azau nga ma ai hte maren, Philippines Mungdan Ramma ni mung sa du shang lawm na matu jin jin rai nga masai rai nga ai.

“Mungkan Ramma nhtoi poi kaba sa du shang lawm na matu mying bang shagrin da sai Philippines Mungdan kaw nna Ramma dat kasa ni nlaw htum marai 70 daram rai sai, dai ni hta jau ni hte Saradaw ni nkau mi mung lawm nga ai, mying jahpan garai nlu la shi ai kaga uhpung ni mung naw nga nga ai majaw Mungkan Ramma nhtoi poi kaba sa du shang lawm na Philippines Mungdan dat kasa ni nlaw htum marai 250 daram rai na re,” nga nna Philippines Mungdan Ramma Commission amu madu Jau Conegundo Garganta tsun dat nga ai.

Dai ning na mungkan nhtoi poi kaba hpe Ka-ang America dan Mungdan langai rai nga ai, Panama mungdan a mare daju hta galaw na rai nga ai, January 22 ya shani kaw nna 27 ya shani du hkra galaw na rai nna, Wa Sarabyin Francis gaw Panama Mungdan de January 23 ya shani du sa wa na rai nga ai, Panama Mungdan hta Wa Sarabyin du gawan nga ai aten, ndai Ramma hpawng kaba de nsa du shang lawm lu ai, hkyuk htawng hkan rawng nga ai ramma ni, HIV ana a majaw machyi makaw hkrum nga ai ramma ni hpe sa du hkrum shaga ai lam Wa Sarabyin galaw na re, nga ai, bai gaw gap gram lajang da ngut sai shaning 400 ning na sai Panama Mungdan Nawku htingnu kaba hpe shaman ya lam hpe mung Wa Sarabyin galaw na, bai Ka-ang America Dan Saradaw ni hte hkrum shaga bawng ban ai lam ni mung galaw na hte Mungkan Ramma nhtoi poi kaba sa du shang lawm nga ai ramma ni hte rau shani shat jawm sha ai lamang hpe mung Wa Sarabyin galaw na re, nga nna Vatican shiga dap Internet laika man hta ka shana da nga ma ai.

Source : Vatican News