Mungkan Matsan Nhtoi:Matsan Mayan Re Ai Ni Gaw Nawku Hpung A Sutgan Rai Nga Ai, Ngu Wa Sarabyin Tsun Da Ai

November 14, laban shani, Wa Sarabyin Francis, Mungkan Matsan Nhtoi masat dingsat mungga shaga da ai hpe Vatican Shiga Dap kaw nna dai shani shapoi da ya ai.

(5) lang ngu na mungkan matsan nhtoi (Fifth World Day of the Poor) hta hkrang mu nsen na Video message hte mungkan ting de Wa Sarabyin mungga shaga da ai hta, “matsan mayan re ai ni gaw nawku hpung a sutgan re ngu tsun da nga ai.

Shi a mungga hta, Wa Sarabyin Francis gaw matsan mayan re ai ni hte ni ni htep htep nga nga ai lam, shanhte a magam bungli hta rau rai nga ai lam tsun da nga ai. Shanhte gaw mayak mahkak lam law law hpe hkrum katut nga ma ai rai nna, nkau ni gaw hkyuk htawng hta, nkau ni gaw matsan lawk/ mare kaw, nkau ni gaw majan kata kaw jam jau nga taw ma ai; nkau ni

gaw kabai kau hkrum ma ai, n kau ni gaw shingtai hkam sha nga ra ma ai.

Shani shagu simlam n lu, lu sha taw, yup ban sa shara n nga rai nna hkrap ngu hkrap ngoi rai nga ma ai.Chyoi Pra Ai Wenyi hpe hpring tup hkam la sai Nu Maria gaw anhte hpe simsa lam jaw ya u ga, matsan dum lama myit kaba hte makawp maga bau sin ya nga u ga, Wa Sarabyin Francis akyu hpyi htinglu htinglai ya nga ai lam mung chye lu ai.

Matsan mayan ni hpe Kabu Gara Shiga garan kachyan ya nga let shanhte ra kadawng nga ai hpe mung garum shingtau ya nga na matu Wa Sarabyin Francis saw shaga da nga ai.

“Ndai ni hta na kaji htum wa hpe nanhte galaw daw myit yang gaw nanhte ngai hpe galaw daw ai rai nga myit dai,” ngu Yesu Madu tsun ai ga hpe myit dum let anhte shada hpu nau majing hku rau kahkying gumding nga na matu mung Wa Sarabyin n-gun jaw saw shaga da nga ai. Dai gaw, anhte ni tsun lu ai, matsan mayan ni gaw nawku hpung a sutgan ngu ai lachyum hpe shalen ya nga ai, ngu Wa Sarabyin matut sang lang da nga ai.

Mungga jahtum hta, matsan mayan re ai ni hpe hkra machyi ai ni, shanhte hpe n shawn ai ni, shanhte hpe shagrit kau ai ni hpe mung Hkristan myit masa hte mara dat ya na matu Wa Sarabyin saw shaga da let, Matsan mayan ni gaw nawku jawng shang chyinghka hpe n madu lu ma ai raitim, Nawku hpung a salum hpe madu lu ma ai.

Shanhte gaw Karai Kasang a sutgan ni rai ma ai, makoi magap taw nga ai san pra masha ni rai ma ai, Karai Kasang a tsawra myit hte rau mungkan masha yawng a salum hpe hpaw ya hkat nga ga, ngu Wa Sarabyin n-gun jaw da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews #rvakachinservice

Source: Vatican news