Mungkan Makau Grupyin Tu Matu Hkrung Mahkrung Hpan Da Hkrum Mahkra Hpe Makawp Maga La Ga

Daining na Mungkan a Shingra maka makau grupyin masat nhtoi (World Environment Day) gaw June 5 ya shani ang ai rai nna, tu matu hkrung mahkrung, hpan da hkrum, mahkra hpe makawp maga la matu hpyi shawn nga ai.

Daining na Mungkan a Shingra maka makau grupyin masat nhtoi (World Environment Day) gaw June 5 ya shani ang ai rai nna, tu matu hkrung mahkrung, hpan da hkrum, mahkra hpe makawp maga la matu hpyi shawn nga ai. Mungkan ga hkam ja na hte shinggyim masha hkam ja lapran matut mahkai nga ai majaw nga yawng nga pra hpe makawp maga na nga ra ga ai.

Mungkan a Shingra maka makau grupyin masat nhtoi (World Environment Day) hpe 1974 kawn June 5 ya shani hpe masat da sai hte maren, shaning shagu galaw lai wa sai. Dai zawn galaw ai a marang e, mungdan asuya magam gun ni, sut masa galaw ai sut du ni, mying dan hkrung ai ni, hte mung shawa masha ni yawng hpe Shingra maka makau grupyin hte seng ai lam ni hta sadi maja makawp maga sa lu na matu shadum jahprang ya nga ai.
Seng 10 daram re ai dusat yam nga hte hpun tum ni htum mat ma na masa hta nga nga ai ndai mungkan hta ya na zawn Mungkan a Shingra maka makau grupyin masat nhtoi (World Environment Day) hta lata san da ai gaw dusat yam nga ni hte hpu ni hte seng ai lam rai nga ai.

UN Amu Madu Daju, Antonio Guterres sadi jaw da ai gaw “Shingra maka anhte hpe shadum nga sai; Anhte mungkan singra maka hpe jahten sharun ai gaw anhte hkum nan hten run lam galaw la ai re” ngu tsun shadum da ai.

Mungkan shingra tara hten za ai hte dusat yam nga, hpun hpan hkum sum hpa hpe jasum kau ai lam tsaw she tsaw wa ai majaw lamu marang nhtuk wa ai hpe dum hprang wa shaga ai; hka hpyen, wan hpyen, laru hpyen ni grau law wa sai. lamu ga, nbung hte panglai hka ni hta katsi kahtet rap ra lam nnga wa ai majaw du sat yam nga ni hte hpun hpan hkum sum hpa ni sak hkrung lu na matu yak wa ai.

Ya ten, Coronavirus ana kanu anhte a hkam ja lam hpe jahkrit shama taw ai hte anhte ni galaw lu galaw sha let sak hkrung nga lu na lam hpe dingbai dingna kaba jaw taw nga sai.
“Shinggyim masha ni hpe yu lakawn na matu gaw anhte ni Mungkan a Shingra maka makau grupyin hpe yu reng makawp maga ra ga ai,”

Dai majaw anhte ni jai lang nga ai arung arai ni hpe bai sawn sumru na ra ga ai. Arung arai hpe na na hkam hkra jai lang ra na; lamu ga hte du sat yam nga hpun kawa ni hpe jahten sharun ai lam nnga ai Hkai lu hkai sha ladat hte sut masa galaw ai ladat ni hpe galaw ra ga ai. Naw ngam nga ai dusat yam nga hpun kawa ni hpe makawp maga na hte tsi tsawm lamu ga tai na matu makawp maga ra ga ai.

The UN Environment Programme (UNEP) Shingra maka makau grupyin hte seng ai UN masin gaw Mungkan Shingra maka makau grupyin hte seng nna woi awn na ahkaw ahkang nga ai rai nna, mungkan lamu ga grin nga na matu hte bawng ring galu kaba wa na matu dai shingra maka makau grupyin hte seng ai masin masa lam ni hpe shatsaw jahkrat ya ai. 

Mungkan lamu ga hkam jan lu ai madang hta lai jan nna jai lang jahten sharun ai lam hkum galaw ga ngu UNEP kawn sadi jaw shadum da ai.

Mungkan a shingra maka makau grupyin masat nhtoi ( World Environment Day) gaw UN a matu shaning shagu galaw ai masat dingsat nhtoi ni hta ahkyak la galaw ai lamang kaba dik ai nhtoi tai wa ai. Mungdan yawng a matu mung anhte mare anhte dum nta masha ni hte ngai na matu mung ahkyak ai nhtoi rai nga ai hpe myit dum let Mungkan a shingra maka makau grupyin hpe manu shadan makawp maga nga ga ngu n gun jaw let Vatican kawn ndau da ai hpe shalai RVA Jinghpaw nsen shapoi dap kawn shalai ndau dat nngai.

Vatican News