Mungkan Makau Grup Yin Nhtoi Masat Dingsat Hku Nna Tanghpre Mare Masha Ni Hpun 100 Jan Hkai

2021  June 5 ya,  Mungkan makau group yin masa nhtoi shani Mali Nmai Zup, Tanghpre kaw shanu nga ai Mare masha ni hpun hkai ai lamang galaw lai wa ma ai.

"Jahpawt hkying 8AM aten kaw nna shani ka-ang ai hkying 12 du hkra hkai ai , Nam Pan hpun hte shaning galu hpun ni madung hkai ai re" nga nna dai kaw shang lawm ai langai tsun lai wa ai.

Kachin Development Networking Group (KDNG) kawn woi awn galaw ai hta  RC, KBC  Nawku Hpung kata na Wa Jau ni , Sara ni hte Ramma hpung masha ni shang lawm let hpun 100 jan hpe Mare grup yin lam mayan hte Nawku Jawng wang ni hta  hkai da lu sai lam lamang hta shang lawm ai  Hkawn Mai tsun dan ai hte maren chye lu ai.

Myit Sone makau grup yin grau grau  tsit lali tsawm htap wa lu na matu hte hka madim tsep kawp n galaw na  matu yaw shada let galaw ai re lam chye lu ai.Mungkan Makau Grup yin makawp maga n htoi shani,  Awng Min Tar hte Myitkyina, Nam Jim Mare hte  Laiza  Muklum ni hta  mung hpun hkai ai lamang galaw lai wa ma ai.

June shata praw 7 ya shani mung Mungkan makau grup yin nhtoi shani lam amyu myu a majaw hpun nlu hkai ai ni a matu Mali Nmai Zup Amyu Shayi Hpung ni kawn woi awn let Myitkyina hte Waing Maw makau na Mare masha ni hpe  hpun ban 1000 mi ram garan ya sai lam, Mungkan makau grup yin Nhtoi a lam hpe grau chye na lu na  nna Mali hka mayan tsit lali tsawm htap nga lu na matu hte tinang a buga ginra ni hpe tsawra makawp maga chye na matu yaw shada let galaw ai re lam, dai hpang Dum Gan Mare Laika Sharin Jawng hte Nawku Jawng makau hkan hpun hkai ai lam galaw lai wa sai lam National Unity Media kaw shana da ai hte maren chye lu ai.

Ndai World Environment Day (WED) hpe 1974 ning  June shata praw 5 ya shani kawn galaw hpang wa ai rai nna, Eco Day ngu nna mung tsun ma ai. Makau grup yin shingra tara hpe makawp maga ai hta madung akyu jashawn hpaji jaw shamu shamawt ai lam ni galaw  na matu UN (United Nation) kawn shatsam n'gun jaw da nga ai.

Thomas