Mung Shawa Masha Ni Hpe Yu Lakawn Nga Ai Mungdan Asuya Ningbaw Ningla Ni A Matu Wa Sarabyin Misa Hkungga Hta Akyu Hpyi Ya Ai Lam Shiga

Mung Shawa Masha Ni Hpe Yu Lakawn Nga Ai Mungdan Asuya Ningbaw Ningla Ni A Matu Wa Sarabyin  Misa Hkungga Hta Akyu Hpyi Ya Ai Lam Shiga

Wa Sarabyin Francis gaw May (2), bat kru ya jahpawt na Misa hkungga hta Covid – 19 a tsim yam hpe hkrum nga ai hta mung masha ni a mayak mahkang ni hpe lam yan amyu myu hku ladat shaw woi awn nga ai mungdan Asuya ningbaw ningla ni hpe Karai Kasang n-gun jaw garum ya u ga matu akyu hpyi ap nawng ya ai.

Wa Sarabyin gaw mungdan Asuya ningbaw ni yawng a matu Casa Santa Marta nawku htingnu kaw nawng jau ai Misa hkungga hta ap nawng akyu hpyi ya sai lam chye lu ai. “Karai Kasang shanhte hpe garum ya u ga; n gun jaw garum ya u ga; hpa majaw nga yang shanhte a lit magam gaw n loi la nga ai re. Shanhte a n bung ai lit magam amyu myu hta shanhte chye na let ya na mayak mahkak hkrum nga ai ten ladaw hta shanhte ni myit hkrum myit ra gahkring gumding ai hte shanhte a mung masha ni a matu woi ningshawng lu mu ga. Myit hkrum gahkrin gumdin ai gaw mayak mahkak hpe ga up dang kau lu nga ai” nga nna Wa Sarabyin Francis shi a akyu hpyi nsen hpe sha praw da nga ai.

Nawku hpung gaw simsa ai hta re. Nawku hpung gaw Karai Kasang hpe hkrit hkungga madat mara ai hta gaw de sharawt hkawm sa nga ai re. Chyoi Pra ai Wenyi a garum shingtau la matsun madun ai hta hkawm sa nga ai nawku hpung gaw lani hte lani law htam ai masha ni jawm pawng wa nga ai re.” nga nna Wa Sarabyin shi a mungga hta chyum mungga langai hpe lakap nna tsun da nga ai.

“Nang gumra ntsa kaw jawn let mali hka rap ai rai jang, hka ka ang kaw gumra hkum galai jawn u” ngu ai Argentina masha ni a ga malai ga shagawp hpe ga shadawn tsun let anhte hpe shadum da nga ai. Madu Yesu hpe kau da ai wa gaw hka ga ang kaw gumra galai jawn ai hte bung nga ai. Dai zawn galaw na malai, ya na zawn mayak mahkak hkrum ten hta mi na anhte a makam hta sha ngang gring let hkawm sa na ra ga ai. Mayak mahkak hkrum ten Madu anhte hpe yu reng nga ding yang re. Mayak mahkak hkrum ten anhte ni kaja grau ai de galai shai sa ra ga ai. Kaja ai kaw na tsan ai de n hkawm hprawng mat ga, ngu Wa Sarabyin tsun da nga ai.

“Madu Karai Kasang anhte hpe ya na mayak mahkak hkrum ten garum shingtau la ya u ga. Anhte a Makam gaw dut sha na matu nre” ngu akyu hpyi let shadum da nga ai hpe Vatican shiga dap kawn ndau da nga ai.

Indonesia mungdan ting na Kahtawlic nawku hpung masha ni, chyam bra nga ai Covid-19 a tsim yam lapran, May (1) ya shani Misa hkungga nawng jau ai hpe live streaming hte shapoi ai hta Maria kaw akyu hpyi htinglu htinglai ai May shata gaw “yawng hte seng ai dum nta” tai nga u ga matu akyu hpyi hpang wa sai lam chye lu ai.

Wa Sarabyin a Matsun laika (Encyclical) “Laudato si” “Mungkan ga hte grup-yin shingra tara hpe makawp maga ga” nhtoi hpe 2015, May 24, Chyoi Pra ai Wenyi Yu hkrat wa ai poi, Wa Sarabyin Francis a Sarabyin tai wa ai (3) ning hpring ai nhtoi hta shapraw dat ai re hpe chye lu ai. Shaning shagu ndai Mungkan ga hte grup-yin shingra tara hpe makawp maga ga” (Laudato si) ladaw hpe May 16 – 24 lapran kaw rai nga ai.Nawku hpung gaw Mungkan madang hku galaw ai (57) lang na (World Day of Prayer for Vocations) shaga la hkum ai akyu hpyi ai nhtoi hpe May 3 hta galaw ai rai nna, Mungkan ting na Saradaw Sasana shagu gaw shaga la hkrum ai masha law htam wa na matu lam yan amyu myu hku galaw nga hpe chye lu ai.

Ndai nhtoi hpe 1963 hta Wa Sarabyin San Pawlu (VI) kaw na shawng ningnan woi galaw shachan hpang wa ai lam chye lu ai. Ndai Vacation Day gaw grau nna Jau, MaMa, Brother tai na matu tinang a sak prat hpe Madu kaw ap let Sasana magam gun na matu shaga la hkrum ai lam hpe tsun ai rai nga ai.

Source; Vatican News