Mung Masa N simsa, Yak Hkak Jam Jau Ai Lapran Mohnyin Jau Ginwang Hta Nawku Jawng Nnan Lahkawng Hpaw Shaman La Lu Sai

Ya aten na mung masa n pyaw, yak hkak jam jau lam ni law law nga ai raitim hpung masha ni a shakut shaja ai hte alu madu ni garum ya ai majaw Mohnyin jau ginwang hta nawku jawng nnan lahkawng hpe hpaw shaman la lu sai.

Mohyin jau ginwang Namsi Awng mare na San Francisxaveir nawku jawng nnan hpe ( 19.2. 2023 ) ya shani hpaw shaman poi galaw la lu sai rai nga ai. Nawku jawng hpaw shaman poi shani Cardinal Charles Bo sa du ai rai nna hpung masha marai ( 215 )  n gun shaja sakramentu mung hkam la lu sai. Nawku jawng hpaw shaman poi Missa hkungga hta  Sara Joseph Jangma La Doi hte Teresa Laba Ja Raw yan a Karai magam gun ( 25 ) ning hpring chyeju shakawn Jubali poi hpe mung galaw la lu sai.

Namsi Awng mare gaw Kahtawlik nawku hpung masha htinggaw 20 jan sha nga ai re majaw buga masha ni a atsam hte  nawku jawng langai gaw gap la lu na atsam n nga ai raitim Karai Kasang a chyeju hte alu madu ni garum ya ai majaw hkik hkam tsawm htap ai nawku jawng kaba hpe gaw gap la lu sai rai nga ai. Nawku jawng ding shawn poi shani mung, mare buga kaw rau shanu nga ai kaga hpu nau makam masham hpung ni yawng masha malu shadu lit la ya ai hte kaga ra ai lam ni hta tsawra myit hte sa du garum ya ai majaw poi hpe angwi apyaw rai awng dang ai hte galaw la lu sai. 

Namsi Awng mare gaw Jinghpaw Mung a jahtum, Jinghpaw Mung hte Sagaing ginwang jarit mung rai nga ai.

( 20. 2. 2023 ) ya shani gaw Mohnyin jau ginwang kata, Namawn mare hta gaw gap da lu sai San Joseph Nawku Jawng hpaw shaman poi hpe matut galaw la lu sai. Namawn mare hta Kahtawlik hpung masha htinggaw 100 jan nga ai rai nna Mohnyin jau ginwang kata No ( 2) hpung masha law dik shara re hpe chye lu ai. San Joseph nawku jawng ding shawn poi hta mung Wa Saradaw kaba Cardinal Charles Bo sa du hpaw shaman ya ai rai nna hpung masha ni marai ( 112 )   n gun shaja sakramentu hpe hkam la lu sai. 

Mohyin jau ginwang hta Cardinal shawng nnan  lang sa du ai rai nga ai majaw hpung masha ni yawng grai kabu n gun lu ai hpe mu chye lu ai.

Shiga - Julia Ja Ing