Mung up du ni the mung masa galaw ai masha ni a matu akyu hpyi ya ga, nga nna Wa sarabyin tsun dat nga ai shiga (17 Sep, 2019)

Mung up du ni the mung masa galaw ai masha ni a matu akyu hpyi ya ga, nga nna Wa sarabyin tsun dat nga ai shiga

Mung up du ni hte mung masa galaw ai masha ni hpe aroi ara nkaw nlaw di nga na malai shahte a matu akyu hpyi ya ga nga nna lai wa sai bat langai ya jahpawt Missa Hkungga Mungga hta, Wa sarabyin Francis lahta na zawn tsun dat ai lam rai nga ai.

Dai shani na langai ngu na chyum mungga rai mga ai 1Tim 2:1-8 hta na, “hkawhkam ni hte ahkang aya lu ai ni mahkra a matu mara mung, hpyi nem ai, akyu hpyi ai, hpyi htinglu ya ai hte shakawn kungdawn nga u ga,” nga ai chyum mungga daw hte la kap nna hkaw tsun lai wa ai lam rai nga ai.

Italy mungdan hta byin nga ai mung masa nhkrum nra lam ni hpe madi madun nna Wa sarabyin tsun ai hta, “mungdan hpe woi awn nga ai asuya ning baw ni, mungdan rapdaw salang ni myit hkrum mang rum ai the mungdan a matu mai kaja lam ni galaw lu mu ga anhte akyu hpyi ya ga ai kun? Tinang a mungdan hpe tsawra ai anhte a mung tsaw, my tsaw myit ni gaw shada kasat hkat, tsun shatan hkat, nkaw nlaw aroi ara tsun mara shagun hkat re ai madang hta sha rawng nga nna akyu hpyi ai ngu ai de nshadu nga ga ai, pawt sindawng ai nju ndawng ai lam ni nshalawm ai sha anhte a chyoi pra ai lata ni hpe sharawt nna shanhte a matu akyu hpyi ya na ra ga ai.

Anhte kaw na grai nlaw ai nkau masha ni chyu sha mung masa galaw ai masha ni a matu  akyu hpyi ya lam galaw ga ai, raitim malawng maga gaw tsun mara shagun, nkaw nlaw aroi ara nga ai ni chyu she galaw ga ai. Jau saradaw ni mung ndai zawn maren re ai masa hpe hkrum lu mai ai, kaja yang chyu sha akyu hpyi ya na, shing nrai yang tsun mara shagun aroi ara nga ai lam ni hpe galu galang tsun nga na, ngu ai masa byin nga ai.

Up hkawng woi ai shara hta nga nga ai mung up du asuya ni hku nna mung chying mung shawa masha ni hpe woi awn lam matsun na lit shanhte hta nga nga ai, dai ni lit magam ni hpe shanhte atsawm gun hpai lu mu ga, Karai kasang shanhte hpe shaman ya nga u ga ngu nna akyu nhpyi ya sha shanhte hpe hkrai kaning di nna anhte tawn shakram da mai na rai ga ta? nga nna Wa sarabyin hkaw tsun lai wa ai lam Vatican shiga dap kaw nna shana dat nga ai.