Miwa Asuya Ni Kahtawlik Hpung Masha Ni A Nawku Jawng Nnan Run Jahten Kau Na Matu Galaw Wa Nga

Gaw gap da ai lahkawng ning daram sha naw re ai, Nawku jawng nnan hpe tara nshang ai gaw gap da ai lam re ngu nna run jahten kau ya na matu, mung up du Asuya ni kaw nna galaw wa nga ai hpe Miwa gum san Mungdan na Kahtawlik hpung masha ni hkrum nga ma ai. Lai wa sai shaning 40 ning daram hta gaw dap da lai wa ai Nawku shara nta tsam mat wa sai majaw, de a makau hta Nawku jawng nnan bai gaw gap da ai lam rai nga ai. Hubei ginwang, Hanyang ngu ai Saradaw ginwang na, Xuwan ngu ai mare kaji hta byin ai lam rai nga ai.

Buga masha ni tsun ai hta, mare langai mi hta Nawku jawng lahkawng nmai nga ai, ngu ai Asuya a masing masa hte maren, Nawku jawng nnan gaw gap da sai majaw dingsa hpe run jahten kau ra ai, dingsa hpe run jahten kau ai lam n galaw ai rai yang nawku jawng nnan a matu license ahkaw ahkang njaw ya na re nga nna tsun ai majaw, Nawku jawng dingsa hpe lai wa sai April shata 12 ya shani run hpra kau lai wa saga ai, raitim mung Asuya kaw nna license htuk ya na naw ning dang nga ma ai, license ra ai rai yang Nawku jawng nnan makau hta nga ai Mama jawng hpe mung la kau ra na re, nga nna bai tsun nga ma ai. Mama jawng shing nrai Nawku jawng nnan langai ngai hpe run kau ra na masa hpe hpung masha ni myit tsang nga ma ai re, nga ai.

Mama jawng gaw shanhte a Buga ginra rawt jat galu kaba wa ai lam a kumla tai nga ai majaw dai hpe jahten jasum kau na hpe mung hpung masha ni nra sharawng ma ai. Nawku jawng nnan run kau hkrum ai rai yang mung, dai ginra hta shanu nga ai 2,000 jan daram law ai hpung masha ni akyu hpyi nawku shara nlu rai jam jau hkrum na masa rai nga ai, nga nna tsun nga ma ai.

Ndai mang hkang byin nga ai Xuwan Mare hta shanu nga ai mare masha yang 3,000 daram kaw nna 2,000 jan gaw Kahtawlik hpung masha ni rai nga ma ai. Hanyang Saradaw ginwang a hpung masha yawng a tsa htam shadang 20 jan shanu nga ai Mare mung rai nga ai, nga nna Ucan shiga dap internet laika man hta ka shana da nga ma ai.     

Source : Ucan News