Methodist nawku hpung hte Waldensian nawku hpung ni ginlung galaw nga ai hkumra hpawng kaba de Wa sarabyin shakram mungga shagun jaw dat nga ai shiga

Matsan mayan dik masha ni hkrum nga ai tsinyam lam ni the seng nna mahtai lama ma ta shapraw lu na myit mada ai, nga nna Methodist nawku hpung hte Waldensian nawku hpung ni ginlung galaw nga ai hkumra hpawng kaba de Wa sarabyin Francis shakram mungga shagun jaw dat nga ai. Italy mungdan Turin hta ndai bat laman “the Union of Methodist and Waldensian Churches” ngu ai nawku hpung ni a ginlung hkumra hpawng kaba galaw nga ma ai rai nga ai.

Shagun jaw dat ai wa sarabyin a shakram mungga laika hta, “ya na zawn jawm hkrum zup, akyu rau hpyi, myit sumru dinglik yu ai lam ni galaw nga ai aten Chyoi pra ai wenyi a garum ya ai chyeju ni hpe hkam la lu mu ga akyu hpyi ya nga ai, Hkristian nawku hpung langai hte langai lapran hku hkau ganawn mazum, sai ning htan lam ni grau grau ngang kang wa u ga akyu hpy ya nga ai, Madu Yesu the shi a Kabu gara ai shiga hpe jet ai sakse hkam nga sa lam ni hkyak hkyak ra ahkyak nga ai, ndai lam gaw Hkristian nawku hpung ni shada da myit hkrum gahkyin gumdin let magam bungli rau jawm galaw gun hpai ai hku nna sha galaw lu mai ai lam rai nga ai, madu Yesu the shi a matsan dum lama ai lam ngu ai Kabu gara ai shiga hpe sake hkam nga lu hkra nawku hpung shada da chye na, hkap la hkat, ta gindun let magam bungli rau jawm galaw sa na matu saw shaga da hkrum ai ni rai nga ga ai, matsan mayan masha ni hkrum hkra nga ai nji nmu tsinyam lam ni hpe gun kau ya lu hkra mahtai tam ya ai, tara rap ra ai lam, simsa ai lam hpe gaw gap ai magam bungli ni hta Hkristan nawku hpung ni gaw Madu yesu a sape ni hkrai rai nga ga ai majaw bung pre ai ning mu the magam bungli ni nga hkra galaw mai ai” nga nna Wa sarabyin tsun dat nga ai.

1975 hta Waldensian Churches ngu ai nawku hpung hte Methodist nawku hpung gahkyin wa ai kaw nna “the Union of Methodist and Waldensian Churches ngu ai uhpung hpaw hpang wa ai lam rai nga ai. Waldensian Churches ngu ai nawku hpung gaw Protestant ngu nna ga garan wa ai lam ni garai nbyin hpang ai ten kaw nna nga nga ai Evangelical nawku hpung langai mi rai nga ai. Italy mungdan hta malawng nga nga ma nga ai zawn Argentina hte Uruguay mungdan ni hta mung tsawm ra mi nga ma ai, yawng rai yang hpung shang masha ni 50,000 daram rai ma ai, nga nna Vatican shiga dap kaw nna shana dat nga ai.        

#churchnews#rvakachinservice#aungnanmkn.