May Shata Rosary Hti Ai Hta Covid-19 Lawan Hkoi Htum Mat U Ga Matu Rai U Ga Ngu Vatican Kawn Ndau Shana Da Shiga

online photo

Wa Sarabyin Francis a myit masin kaw nna nan myit ra lam kaba langai rai nga ai majaw 2021 shaning na May shata Rosary hti lamang hta Mungkan ting Covid 19 ana kanu hkoi htum mat u ga matu Mungkan ting n hkring n sa Rosary hti ga ngu “Global Rosary Marathon” gabaw ginlam hte Vatican kaw ndau da ya ma ai.

Ndai zawn ndau ya ai gaw Wa Sarabyin Francis hkum nan a myit ra lam hpe “the Pontifical Council for the Promotion of the New Evangelization kawn April 21 ya shani sakse hkam tsun ndau da ya ai majaw ndai yaw shada lam hpe ndau ya ai re lam chye lu ai.

Mungkan ting hta Kahtawlik makam hte seng ai Maria Lungpu, Maria Sumla zawn re ai chyoi pra ai kumla hkrang ni hpe tinghkrai rai tim, kun dinghku kata rai tim, wuhpung wuhpawng kata rai taim gaw de let Rosary hti akyu hpyi ai hta shakut nga na matu Council kawn n-gun jaw da nga ai.

Chyoi Pra ai Maria Lungpu nga ai shara 30 hta shani shanang Rosary hti ai hpe shani ka-ang hkying 12:00 P.M, aten hta man man galaw nna live shapoi ya nga na re lam mung Vatican kaw nna ndau da ma ai.

May shata hpang ai shani Wa Sarabyin Francis hkum nan Rosary hti let Chyoi Pra ai Maria kaw akyu hpyi htinglu htinglai ai lam hpaw hpang woi na re lam hte May shata jahtum shani mung shi hkum nan woi awn akyu hpyi na re lam mung ndau da ma ai.

Wa Sarabyin Francis a mungga law malawng hta Covid-19 ana zingli a majaw machyi kaba hkrum jam jau nga ai ni hte si mat sai wenyi ni a matu myit yawn let akyu ja ja hpyi ya nga ai lam ni lawm nga ai.

Chyam bra ana Covid-19 gaw mungdan shagu hte mung shawa masha langai hpra ap nawng daw jau lam galaw nan galaw ra ai hpe shadum nga ai. Ndai mayak gaw mungkan ting, mungdan shagu, wuhpung wuhpawng shagu myit masin hkung hkrang rau langai sha hte nau na myit majing hte pawng hpawng let sak hkrung nga pra na matu shadut ya nga ai; mayak mahkak lam ni hpe rau jawm gasat manga na matu shadut ya nga ai.

Covid-19 hpe jawm gasat na gaw grai nan ahkyak nga ai; Covid makawp tsi “Vaccine” hpe sawk sagawn htuk shapraw ai gaw mungkan ting hte seng ai mai kaja lam hpe shabyin ai rai nga ai; Karai Kasang a ga sadi tawn da ai lam hpe hkan shatup ai mung tai nga ai, ngu Wa Sarabyin Francis tsun sang lang da nga ai.

May Shata hta Wa Sarabyin a yaw shada ai, Vatican a yaw shada ai, Kahtawlik Nawku Hpung a yaw shada ai, Myanmar mung shawa masha ni a yaw shada ai, anhte a Saradaw Ginwang a yaw shada ai, anhte Jau Ginwang a yaw shada ai, anhte mare/ lawk a yaw shada ai, anhte wuhpung a yaw shada ai, anhte kun dinghku a yaw shada ai, ngai hkum nan a yaw shada ai lam ni hpe Karai a Kanu Chyoi Pra ai Nu Maria akyu hpyi htinglu htinglai ya u ga Maria lungpu, Maria sumla ni alu atai galaw let Rosary hti akyu hpyi ai hta mung shakut shaja lu na matu yaw shada let Catholic News Agency Shiga Dap kaw ndau da ai hpe RVA Jinghpaw Nsen Shapoi Dap kaw nna ndau ya dat ga ai.

https://www.catholicnewsagency.com/news/247356/vatican-dedicates-may-to-global-rosary-marathon-for-end-of-covid-19

https://aleteia.org/2021/04/21/pope-to-launch-30-day-rosary-relay-led-by-30-shrines-for-end-of-pandemic/

 

Add new comment

3 + 3 =