May Shata “Marathon of Prayer” Rosary Hti Ginchyum Dat Shangut Lamang Hpe Wa Sarabyin Hkum Nan Woi Awn Na

May 31, bat langai ya shani, May shata Rosary hti akyu hpyi ginchyum dat lamang hpe Vatican Gardens sun wang hta galaw na rai nna, dai lamang hta Wa Sarabyin Francis woi awn sa wa na re lam Vatican Shiga Dap kaw nna ndau da ma ai.

Daining na May shata na Rosary hti akyu hpyi ai yaw shada lam hpe Covid-19 tsin-yam hkoi htum mat u ga matu mung ahkyak kaba hku lawm nga ai.

Wa Sarabyin Francis gaw Germany mungdan, Augsburg kaw hkringdat galaw shachyaw ai Hkunset Maria sumla kaw kamhpa myit kaba hte akyu hpyi htinglu hting lai ai lam hpe man man galaw ai wa re lam chye lu ai.

Dai Maria sumla gaw tsaban 18 daram hta galaw shachyaw shatsawm da ai rai nna, lairi sumri ni hpe raw taw nga ai Maria hpe lamu kasa lahkawng hpawn sharawt da ai sumla rai nga ai. Myit mada lam, matsam dum lama lam jaw ya nna, n kaja ai lam ni hpe tawt lai lu ai hpe lachyum shalen ai hkrang shapraw da ai gaw Chyum laika na Maria hpe pra pra mu shangun nga ai.

Augsburg na Saradaw Bertram Johannes Meier gaw mi na sumla madung hpe hkrang bung sumla bai galaw shachyaw shatsawm da ai Maria sumla hpe May 31, bat langai ya shani Vatican Gardens sun wang de la sa na nna Wa Sarabyin Francis hpe ap jaw na re lam chye lu ai.

“Marathon of Prayer” N Hkring Nsa Rosary hti akyu hpyi ginchyum dat lamang a Yaw Shada Akyu Hpyi Na Lam (5) hpe lata san da ma ai.

1. Chyam bra ana tsin-yam hkrum ladaw ni hta machyi sawng grau wa ai shinggyim kanawn mazum lam, shingtai hkam sha lam hte hkau da hkrum ai lam ni n nga u ga matu
2. Bungli n lu ai ni, grau nna ramma ni, myu shayi ni hte kun dinghku kawa ni a mayak mang hkang ni hpe hparan sa wa lu na matu hte bungli madu ni a sut masa lam hta bungli galaw nga ai ni hpe makawp maga lu na matu
3. Dinghku nta kata gumshem ai lam, myu shayi ni hpe roi rip dang shang ai lam, hte ya daini na aten hta grau grau sawng wa ai shinggyim masha shada n ru n ra byin ai lam ni htum mat u ga matu
4. Shinggyim masha ni a rawt jat galu kaba lam hte seng nna hpungtang hpaji hte sawk sagawn ai tam mu la ai lam ni gaw shinggyim masha yawng a matu re ai hte maren, grau nna matsan ai ni hte n dep n hkap ai ni hphe garum jaw garum ya lu na matu
5. Kahtawlik Nawku Hpung masha ni myit sharawng shara ai lam hpe bai lu la let, tinang a prat hta myit marai ningnan hpe hkam la lu na hte, ramma ni hkungran kun dinghku de nna dai kun dinghku hte shawng lam myit mada hpe gaw de sa wa lu na matu ni rai nga ai.

Wa Sarabyin hte rau Rosary akyu hpyi ai hpe Vatican kaw nna shapoi taw nga ai Vatican media channels shagu, bai Vatican Radio hte Vatican News Website ni hta live shapoi ya na rai nna, na lahpang na nna ai ni a matu “Italian Sign Language” Italy ga kumla hkrang madun nna madun mat na re lam chye lu ai.

France mungdan na “Notre Dame de Boulogne”, Germany mungdan na “Our Lady of Schoenstatt”, Rwanda mungdan na “Our Lady of Sorrows”, Chile mungdan na “National Shrine of Maipu”, Spain mungdan na Nuestra Senora de Os Gozos”, Scotland mungdan, Carfin na “Shrine of Our Lady of Lourdes”, Paraguay mungdan na “Basilica Shrine of La Virgen de los Milagros de Caacupe”, Italy mungdan, La Spezia na “Our Lady of Health” ni mung ndai Rosary hti ginchyum dat lamang hte matut mahkai let shang lawm sa wa na re lam chye lu ai.

Maria sumla hta jan mau shagup na lam hpe mung galaw na rai nna, Wa Sarabyin Francis hkum nan dai jan mau hpe shagup nna “Marathon of Prayer” May shata na n hkring n sa Rosary hti akyu hpyi lamang hpe ginchyum dat shangut na re lam Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-05/pope-to-conclude-month-of-prayer-with-rosary-in-vatican-gardens.html