Matsan Mayan Masha 1500 hte Rau Wa Sarabyin Shani Shat Jawm Sha Lai Wa

Matsan mayan masha ni a Mungkan masat nhtoi shani rai nga ai lai wa sai laban shani hta, matsan masha 1500 hte, shanhte hpe garaum lakawn lam ni galaw ya nga ai ap nawng masha ni hte rau Wa Sarabyin Francis shani shat jawm sha lai wa ai.

San Peter Nawku Htingnu kaba hta Missa hkungga nawng ya ngut ai hpang, San Peteer pa kaba hta tsun shaga ai Wa Sarabyin a mungga hta, matsan masha ni a jahtau madai ai n-sen ni hpe sadi sahka ahkyak shatai madat ya ai lam ni galaw ya na matu Wa Sarabyin Francis kaw nna hpung masha ni hpe shadut dat nga ai.

Matut nna Wa Sarabyin tsun ai hta, “matsan masha ni a jahtau madai ai nsen ni lani hte lani grau grau law jat wa nga ai raitim, madat ya ai masha ni gaw yawm mat wa nga ai, kachyi sha re ai sahti kami ni a garu gachyi nga ai nsen ni a npu hta ndai matsan masha ni a jahtau madai ai nsen ni lup kaput hkrum mat nga ma ai, sahti kami ni gaw kachyi sha re ai wuhpung sha rai nga ma ai raitim shanhte gaw grau grau she sahti jat wa nga ma ai” nga nna Wa Sarabyin tsun lai wa ai.

Mungga shaga ngut ai hpang, matsan masha ni hte rau shani shat jawm sha na matu San Pawlu VI gawknu kaba na mawn sumli shatsawm tawn ai sha ku hta Wa Sarabyin Francis shara la lai wa ai. Shat garai nsha shi yang, ya na zawn shani shat lajang ya ai chyeju madu alu madu ni, daw jaw garum ya nga ai ap nawng ni yawng hpe chyeju dum ga nga nna tsun let akyu hpyi shaman ya ai, de a hpang matsan masha ni hte rau Wa Sarabyin shani shat jawm sha lai wa ai.

Source : Vatican News