Matsan Masha Ni Hpe Garum Shingtau Ya Nga Ai Mama  Langai Hpe, India Mungdan Hta Matut Nga Na Ahkang Dawm Kau Dat Ya

Shaning 50 ning jan matsan masha ni hpe garum shingtau lam galaw ya nga ai, asak 86 ning rai sai Spain myusha Mama ding gai langai hpe, hpa mara a majaw re ngu ai madi madun lam ni nnga ai sha India Mungdan kaw nna gawt shapraw kau ai lam asuya kaw nna galaw dat nga ai.

The Daughters of Charity ngu ai Mama uhpung kaw na, Mama Enedina gaw, August shata 11 ya shani Visa nhtoi jat na matu Asuya rung de sa ai shaloi Visa nhtoi matut jat ya na lam hpe Auya kaw nna ning dang kau ya let, nhtoi 10 ya laman Mungdan kaw nna pru mat wa ra ai, ngu nna tsun dat hkrum ai majaw, August 20 ya shani India Mungdan New Delhi kaw nna Spain de gin htang wa mat sai re, nga ai.

Tsi Sarawun mung rai nga ai asak 86 ning rai sai Mama Enedina gaw 1960 ning grup yin hkan kaw nna India Mungdan sinpraw maga na matsan mayan masha ni hpe tsi gawn lajang garum ya ai magam bungli ni galaw nga ai Mama re, nga ai.

“Mama Enedina gaw 1965 ning kaw nna India Mungdan hta du nga ai re, dai aten kaw nna matut manoi  India kaw shanu nga na Visa hpe aten du shagu man man jat la la di rai let nga ai re, ndai lang mung Visa nhtoi bai jat na aten du sai majaw Internet Online kaw nna asuya matsun ai hte maren galaw ai, bang ra ang ai gum hpraw ni hpe mung bang ngut rai nna yawng shajin ngut ai hpang, ‘nhtoi 10 ya laman Mungdan kaw nna pru mat wa ra ai’ nga ai rung kaw nna matsun laika shana wa ai, hpa majaw re, ngu ai lam hpe chyawm gaw Asuya kaw nna tsun shana ai lam nnga ai” nga nna Daughters of Charity Mama uhpung a India Mungdan Mama kaba Martha Pradhan shiga dap de tsun shana dat nga ai.

India Mungdan a Hkring Mang daju Narendra Modi  gaw Hindu makam masham hpe madung da ai BJP ngu ai mung masa party kaw nna rai nga ai hte, ra lata poi hta lahkawng lang num daw hta mung bai dang la ai hpang, Hindu ni hku nna India Mungdan hta sasana galaw nga ai mai gan masha ni hpe wa kau shangun ai lam galaw na matu shadut ai lam ni grau law wa ai, India Mungdan na matsan ai baw sang masha ni hpe garum ningtum lam ni galaw ya nna Hkristan sasana majen je ai lam ni galaw ai, ngu tsun mara shagun ai lam ni nga nga ai, nga nna Ucan shiga dap kaw nna shana dat nga ai. 

Source: ucannews