Masha Jahpan Lawan Ladan Law Jat Wa Ai Lam Hte Seng Nna  Kahtawlik Nawku Hpung Hpe Philippines Mungdan Gumsan Magam Duterte Mara Shagun

11 June 2019 , Philippines

Ndai lahkawng masum ning laman, Mungdan  masha jahpan lawan ladan law jat wa ai gaw Kahtawlik Nawku hpung a majaw re, nga nna Philippines Mungdan gumsan magam Duterte Nawku hpung hpe mara shagun lam tsun dat nga ai.

 “Anhte a mungdan gaw lawan dik ai hku masha jahpan law htam jat wa ai Mungdan re, ndai zawn byin ai gaw Kahtawlik Nawku hpung a majaw re, Mungdan masha jahpan htinghkang na matu yaw sing ai masing hpe ninghkap nga ai ni gaw Kahtawlik Nawku hpung ning baw ni rai ma ai” nga nna Philippines Mungdan shiga dap ni hte hkrum shaga ai aten lahta na zawn gum san magam Duterte tsun dat ai lam rai nga ai.

Philippines Mungdan Saradaw uhpung a kun dinghku hte seng ai Commission ningbaw usa rai nga ai Jau Melvin Castro tsun ai hta gaw, “ya na zawn Gumsan magam kaw nna Nawku hpung hpe mara shagun lam tsun dat ai gaw myit npyaw hpa lam rai nga ai, ma nkap hkra tsi mawan arung arai ni hpe sung lang ai lam gaw hkap la mai lam nrai nga ai,” nga nna tsun dat nga ai.

Philippines Mungdan gaw, masha jahpan lawan dik ai hku nna rawt jat wa ai mungkan mungdan langai rai nga ai. UN mungkan rapdaw kaw nna maram da ai jahpan hku nga yang, Philippines mungdan hta masha jahpan wan 108 jan rai nga sai rai nga ai.

Masha jahpan law jat wa ai lam hpe shadawn masat htinghkang ai lam galaw lu na matu, ma nkap hkra tsin mawan arung arai ni hpe lang na ahkang jaw ai upadi langai hpe 2014 ning hta Philippines Mungdan Asuya kaw nna shagrin jahkrat dat ai. Dai tara gaw Nawku hpung a sharin shaga lam the ninghtan shai lam rai nga ai majaw, hpung masha ni a matu hkan sa ra ai matsun hpe 2014 ning hta Philppines mungdan Saradaw ni kawn ndau shapraw lam galaw da ai.

Gumsan magam Duterte hku nna gaw, makam masham a majaw ndai tara hpe nhkan lu ai rai yang bungli kaw nna hkring pru mat mu, nga nna asuya hkamja dap hta magam gun nga ai ni hpe tsun shadut lam galaw nga ai. Nawku hpung kaw nna Saradaw ni matsun da ai hta gaw, Asuya hkamja dap hta magun gun nga ai ni hpe ma nkap hkra galaw ai tsin mawan arung arai ni hpe gam jaw shangun ai lam hpe atik anang nmai galaw shangun ai. Makam masham sharin shaga lam ni hte ninghtan shai ai majaw, ma nkap hkra galaw ai lam ni, tsin mawan arung arai gam garan jaw ai lam ni galaw na ningdang ai hkamja dap magam gun ni hpe mara shagun nmai ai, ndai zawn ningdang ai lam gaw Mungdan a tara tawt lai ai lam ntai ai, nga nna Philippines Mungdan Saradaw ni matsun da nga ma ai lam Ucan shiga dap internet laika man hta ka shana da nga ma ai. 

Ga gale : Fr.Bernard

Source: UCAN NEWS