Mare Kata Na Ramma  Ni Kawn Alak Mi Re Ai Mahkrai Langai Galaw La Ngut

Htarung Ramai Hka Mahkrai / Sanlu Ram Seng

Putau Muklum, Mahkum Kan Mare makau de na Htarung Mai hka kaw Mare kata na ramma ni jawm shakut let alak mi re ai mahkrai langai gaw gap la lu sai lam chye lu ai.

 

Dai mahkrai gaw, Putau kawn 5 ya daram lam hkawm ra ai, dingdung maga de nga ai Lahkum Kan Mare kawn deng mi tsan ai shara kaw na Htarung Ramai Hka kaw gap hkrai tawn da ai rai nna, galu de pe 300 nga nna pe mi pa ai hpun pyen nep nhtawm lahkawng maga lata jum tek na shara lawm ai mahkrai re hpe chye lu ai.

 

Ndai mahkrai gaw Miwa mung kawn Myanmar mungdan de lwi yaw wa ai Htarung Ramai hka mayan amu galaw sha nga ai Buga masha ni a matu grai manu dan ahkyak nna akyu nga ai Mahkrai rai nna, lai wa sai ten hta sumri langai hta grang di da nhtawm (zip line ) dai kawn yak yak hkak hkak hte rap ra shara re hpe chye lu ai.

 

Mahkrai hpe gawgap ai hta lang ra ai hpun pyen ni rep na matu Putau Mare kawn jak sau ni hpe gun garum na masha ni hpe htaw wa shangun nna pe mi pa ai hpun pyen ni rep nhtawm galaw ai re lam, ra ai ja gumhpraw ni hpe Putau kaw na Nu Nue Nge ngu ai salang jan kaw alu jaw bang ya ai re lam, yawng pawng yang sen 36 sha ma ai majaw manu yawm dik hte gap la lu ai mahkrai re ai lam mahkrai galaw ai hta shanglawm ai Putau kaw na garum ningtum hpung malawm Sara Sanlu Ram Seng tsun lai wa ai.

 

Ndai zawn tsan ai shara hta mahkrai langai lu galaw na gaw grai yak ai, ba mung grai ba ai, hkrit mung hkrit ra ai, Mahkrai gap na matu Mare kata kaw na salang langai hte jahkrup bawngban nna galaw hpang ai, ya shata 10 na ai hpang gaw  ndai zawn re ai mahkrai langai hpe galaw ngut la lu ai majaw grai kabu ai, ya kawn gaw Mare masha ni shimlum ai nhkrit ntsang rai hkawm sa mai sai” nga na mahkrai gawgap ai kaw shang lawm ai Sanlu Ram Seng tsun lai wa ai.

 

Matut nna Hpung Ram mahkrai hte Nam Ra mahkrai mung alu madu ni garum madi shadaw ai hte gaw gap nga dingyang rai nna kade nna ai aten hta ngut kre la sana re ai lam chye lu ga ai.

 

Putau Ginwang hta bum hkaraw law ai hte maren hkawm sa hkawm wa yak ai majaw  Asuya kaw nna hka mahkrai ni gawgap na masing jahkrat ai lam nnga ai zawn ta tut gawgap ya ai lam n galaw ai majaw ya na zawn Buga masha ni dangdi dangdep rai byin mai ai hku galaw shakut ra ai re lam chye lu ga ai.

 

Thomas

Source : Sanlu Ram Seng

Add new comment

4 + 7 =