Manmaw sasana hta Christmas poi hpe Galaw lai wa sai shiga ( 27 December 2019 )

Daining na, Christmas Yup tung Missa Hkungga hpe, mungkan mungdan shara shagu hta, December shata (24) ya shana galaw lai wa sai zawn, Manmaw Sasana, San Patrick Nawku Htingnu Kaba hta mung, (24) ya shana, (8:00 P.M) aten hta angwi apyaw hte galaw lai wa sai rai nga ai.

Dai Yuptung Missa hkungga lamang hpe, Ginwang up Wa Jau John Jangma Yung Wa hte rau, Wa Jau Joseph Labang Tu, Wa Jau Relly Daw La, ni kaw nna nawng jau ya let, hpung masha ni marai (1000) mi jan ram sa du shang lawm lai wa sai rai nga ai.

Dec (24) ya shana na Kabu Gara Mungga hpe Wa Jau Relly Daw La kaw nna, gam garan ya sai. Shi tsun ai Mungga hta, “Tsawra Myit ngu ai gaw, manaw manang ni hpe N-Gam garan jaw shi yang gaw, dai hpe tsawra myit ngu nmai tsun nga ai. Wan shadaw hpe mung, wan shatu nna n shachyi ding sang gaw, Wan Shadaw ngu nmai tsun nga ai.” Nga nna, gam garan ai lam galaw lai wa sai.

Dec (25) ya shani na Christmas Missa hkungga lamang hpe gaw, Jahpawt (8:00 A.M) aten, Ginwang up Wa Jau John Jangma Yung Wa hte Wa Jau Joseph Labang Tu yen woi awn nawng jau ya lai wa sai. Dai jahpawt na Kabu Gara Mungga hpe, Wa Jau John Jangma Yung Wa gam garan ya sai. Shi a Mungga hta, daini na Christmas poi shani, anhte shada da mara raw dat hkat let, “SORRY” tsun hkat ra ai aten rai nga ai. Lama na, SORRY ngu ai ga n nga jang, mungkan mungdan shara shagu hta Majan ngu ai ding yang byin taw na sha rai nga ai. Anhte gaw, shing gyim masha rai nga ga ai hte maren, shut hpyit wa ai ten hta shada da SORRY ngu tsun nhtawm mara raw dat hkat ra nga ga ai.” Nga nna gam garan lai wa sai.

Missa Hkungga ngut ai hpang, Wa Jau kyu hpyi shaman shakram ya let, shada lata shakram hkat nhtawm, Merry Christmas ngu ai Mahkawn hpe yawng arau jawm hkawn lai wa sai. Dai hpang, ginsup lamang ni matut galaw let, shana maga na Missa lamang hpe (4:00 P.M) aten matut nawng jau ya nhtawm, shana na aten hta mung, Yungwi Pyinra lamang ni galaw rai let, daining na Christmas poi lamang hpe angwi apyaw galaw lai wa sai rai nga ai.

Sister Rose Angeline Maran Nang Doi (RVA)