Manila Hka Mang Hkang A Matu Akyu Hpyi Ga Nga Nna Manila Saradaw Kaba Cardinal Tagle Hpung Masha Ni Hpe Tsun Shadut Lam Galaw

Philippines Mungdan Mare daju, Manila Mare kaba hta hka dum hprut ai mang hkang laja lana hkrum hkra nga ai aten, marang htu na matu akyu hpyi ga nga nna hpung masha ni hpe tsun shadut ai lam, Manila Saradaw kaba Cardinal Luis AntonioTagle galaw dat nga ai.

El Nino ngu ai nbung kahtet hta ai lam byin hkrum nga ai majaw Manila Mare daju hta, shaning 10 jan ning laman sawng dik ai masa hte hka dum hprut ai mang hkang byin hkrum nga ai, nga nna kung kyang ai seng ang ai lit nga ai ni kaw nna ndau shapraw ai lam galaw dat ai hpang ya na zawn Cardinal Tagle kaw nna akyu hpyi na matu hpung masha ni hpe tsun shadut ai lam galaw dat ai rai nga ai.        

Cardinal ndau shapraw ai laika hta, “shingra tara e marang jahtu ya yang chyu sha anhte hkrum hkra nga ai hka mang hkang kaw nna lawt lu na re, hpan da Madu Karai Kasang kaw akyu hpyi ga, Madu matsun dat ai rai yang, nbung hte Panglai ni madat nna marang htu wa na re. Karai Kasang anhte hpe matsan dum nna anhte ra nga ai marang jahtu dat ya u ga, Sumsing Mungdan kadu hkra anhte akyu jawm hpyi ga” nga nna hpung masha ni hpe tsun shadut ai lam galaw dat nga ai.