Mandalay Sasana a matu, Saradaw Nnan hpe Wa Sarabyin kaw nna lata san dat sai shiga (03 May 2019)

Mandalay Sasana, Saguremwa Wa Saradaw Nicholas Man Htang a malai Sagurem lit magam hpe gun hpai na matu, Mandalay sasana kata kaw na sha rai nga ai, Wa Jau Mark Tin Win hpe, lai wa sai April shata (25) ya shani, Wa Sarabyin Francis kaw nna lata san dat sai rai nga ai.

Wa Jau hpe lai wa sai 1960 ning April shata 22 ya shani, shwebu ginwang, mung-hla mare kaw shangai chyinghkai wa ai rai nga ai. Mung-hla mare kaw, lawu tsang hte lapran tsang jawng sharin hka ja la let, Pyin Oo Lwin, San. Aloysious Jau tai jawng kaji de sa du hpaji sharin hkaja la lai wa sai. Myit sawn hpaji the chyum hpaji ni hpe gaw, Yangon jau tai dakksu hta hkaja la lai wa sai rai nga ai. Dai zawn, 1987 ning, September shata 22 ya shani gaw, jau tai aya hpe hkam la lai wa sai rai nga ai.

Wajau gaw, mi shi laika hpaji sharin hkaja la lai wa sai, San. Aloysious Jau tai jawng kaji kaw, jau tai ngut ai hte (1987-1990) ning laika sharin sara lit magam gun hpai lai wa ai. 1990-1992 ning du hkra gaw, Mandalay, San. Aloysious Jau tai dakkasu tau jawng hta Laika Sharin sara lit magam hpe bai gun hpai lai wa ai.

1992-1997 ning du hkra, Italy mungdan, roma mare kaba na, Universita Pontificia Urbaniana hta e, Myit sawn hpaji hpe Phd (Doctorate) janmau hpe gup la lu sai rai nga ai. Dai hpang 1997-2002 ning du hkra, kaga hpunau nawku hpung ni hte tsun shaga kanawn mazum ai lam hta lit hkam magam gun hpai lai wa sai. 2002-2003 ning du hkra gaw, Mandalay, san Thomas Jau tai dakkasu tau jawng hta jawng up lit magam hpe gun hpai lai wa sai. 2003-2010 ning du hkra gaw, saradaw ginwang a gumhpraw kunhting magam lit hpe gun hpai lai wa sai. Dai hpang 2010 ning hta gaw, Sagaing na, Hkristan ni hpe makawp maga ya ai Nu Maria, jau ginwang hta ginwang up jau lit magam hpe gun hpai lai wa sai.

2010-2013 ning du hkra gaw, Myanmar mungdan saradaw wuhpung a amu madu lit magam hpe gun hpai lai wa sai.

Ya ten hta gaw, Mandalay sasana, Saradaw a gawng malai lit magam (Vicar General), Pyin Oo Lwin, san Joseph Jau tai dakksu hta myit sawn hpaji sharin sara lit magam, Christian Meditation Center a lit hkam Jau hku nna magam gun hpai taw nga ai rai nga ai lam, CBCM OSc Facebook laika man kawn chye lu ai.