Mali Nmai Zup madim kaba masing Jahkring da ai (7) ninghpring poi lamang galaw lai sai shiga!

Mali Nmai Zup  Madim kaba Masing jahkring da ai 7 ning hpring  poi lamang hpe 1^st October,2018 ya shani 11:00am ten hta Tang Hpre mare Mali Hpungmai Zup Jinghpaw Wunpawng htung hking hte laili laika hpung wang hta (Jahkring kau ra sai)  ngu ai ga baw hte galaw lai wa sai re.Ndai Lamang hta Makam Masham hpung ningbaw ni,(Enviroment movement in Burma) kaw na ningbaw Daw Devi Thant Sin, 88 Jawngma dingsa Slg.Mya Aye,Laika ka sara Maung Sein Win(Padi Kone),Dr.Khin Maung Nyu hte Makau hkrup yin shingra tara hte seng ai Wuhpung Wuhpawng ni,Nhprang wan ni hte seng ai hpaji ninghkring ni,Mali Nmai zup masing a majaw htawt kau hkrum ai buga masha ni hte mung shawa 1000 daram sa du shanglawm lai wa sai.

Ndai lamang hta buga masha ni,wuhpung wuhpawng kaw na ningbaw ni mung Mali Nmai Zup Madim masing hpe tsep kawp nan jahkring kau na lam hpyi shawn dat sai re. mung shawa nra ai Asuya ya prat hta ndai madim masing hpe jahkring da ai raitim Mung shawa ni lata dang da  asuya prat hta lahkawng ning na sai raitim ya du hkra matut nna tsep kawp jahkring kau na, matut galaw na ngu ai hpe mung shawa ni hpe asan sha  tsun na matu hpyi shawn dat ma ai re.Ndai Mali Nmai Zup gaw Wunpawng myu shani matu, amyu sha lam htung hking lam labau lam ni hta ahkyak ai zawn Myanmar mung dan ting a masat asak hka nu kaba re majaw matut nna n galaw ai sha tsep kawp dawm kau ya na matu hpyi shawn dat ma ai.

Ndai madim a majaw mare 47 ,htinggaw 1900 jan,masha marai Mun mi jan htawt kau ra na rai nna, ya ten mare 7 gaw Aung Min tar,hte mali yang mare ni hta htawt sit nga ai re.Mungdan Gum san magam dingsa Slg.Ting Sein a lata hta Ndai Mali Nmai Zup Madim kaba hpe 2011 ning September 30 ya shani, shi a asuya ten hta jahkring da na lam ndau dat ai hta  2018 September 30 ya shani hta gaw 7 ning hpring sai rai nga ai.Ndai madim hte seng nna Miwa asuya hte myit hkrum da ai lam hpe Mung shawa ni hpe ya du hkra brang lang tang madun da ai lam nnga shi ai majaw  ya du hkra mung shawa ni hpyi shawn taw nga ai re lam chye lu ai.

Shiga sawk tang madun ai- John Nhkrai Mung Hkrang