Makam Masham lam hta gawng kya wa ai majaw Makam Masham sharin hpawng galaw lai wa sai shiga!

        Chi Hpwi jau ginwang hta Miwa mungdan hte jarit rai nna masha grai kayau ai hte kaga makam masham hpung ni kaw nna adawt shahpyak ai lam a majaw hpung masha ni makam masham lam hta gawng kya wa majaw makam masham ningja jat sharin hpawng hpe  Chang Ying Hku mare San Vincent De Paul Nawku Jawng hta September 2 kaw nna 5 (2-5/9/2020) ya shani du hkra galaw lai wa sai lam Chi hpwi ginwang up Wa Jau Peter Ungsau Tang Gun tsun ai hku nna chye lu ai.

       Ndai makam masham sharin hpawng hta Chyiphwi jau ginwang Kahtawlik nawku hpung masha Num Hpung, La Hpung hte  Ramma ni marai - 40 jan sa du sharin lai wa sai lam mung chye lu ai.

       Ndai sharin hpawng hta Wa Jau Peter Ungsau Tang Gun (ginwang up),Wa Jau Vincent Zinwa Shan Lum (Justice and Peace Myitkyina),Wa Jau Alexender De’ De,Bro. John Byin Tu Awng,Sr.Lucy Htu Lum,Sara John Shadan Hkang Tu Shan hte Saranum Monica Kai Seng ni kaw nna Kahtawlik Nawku hpung a sharin shaga ai lam,hkye hkrang la ai lam,,sakrementu a lam,Chyum laika hte seng ai lam,Alu bang chye ra ai lam ni hpe sharin ya lai wa sai lam sharin hpawng hta shanglawm garum lai wa sai Bro. Peter La Bu Naw San tsun ai hku nna chye lu ai.

        Ndai sharin hpawng a yaw shada lam hte seng nna Ginwang up Wa Jau Peter Ungsau Tang Gun tsun ai hta “Chang Yin Hku hte Chyi Chyar mare lahkawng hta makam masham Wenyi lam hta gawng grai kya wa ai,hpa majaw nga yang ndai shara gaw Miwa mung jarit re majaw masha mung grai kayau ai,Sacraments ni hte seng nna mung manghkang law law nga ai,kaga makam masham hpung hku nna mung adawt ai shahpyak yu kaji ai,Kahtawlik gaw Karai Kasang hpe Naw ai nre Sumla hpe Naw ai re nga manghkang amyu myu nga ai grau nna hpung masha ni mung hpyi lajin ai majaw ya zawn sharin hpawng galaw ai re” nga tsun ai.

         Ndai sharin dabang gaw Chyi Hpwi jau ginwang hta  Nawku hpung kaw nna shawng nnan galaw  ai makam masham sharin dangbang re ai lam mung Wa Jau Peter Ungsau Tang Gun tsun ai hku nna chye lu ai.

By; John Mung Hkrang