Mai Ja Yang Myu Sha Hpaji Dakkasu Jawng Yu Poi Galaw

Wunpang Mungdan shanglawt Uphkang Ginra, Mai Ja Yang Muklum kaw hpaw tawn da ai , Mai Ja Yang Myu Sha Hpaji Dakkasu Jawng kaw numbat langai lang ngu na Jawng Yu Poi hpe lai sai Frebruary shata 29, 2020 ya shani galaw ai lam chye lu ga ai.

Jawng yu poi hta Jawngma yawng marai (82) hpe Jawng up, Dr. Nangzing Lu Awn kaw nna jawng yu let mat hte Bachelor Janmau shagrau jaw ya ai rai nna, Jawng yu hpawng hta Wunpawng Mungdan Shanglawt Asuya Salang ni, Makam masham hpung ningbaw ni, Jawng hta ra kadawn nga ai lam ni hpe garum madi shadaw ya nga ai Uhpung Uhpawng ni, Jawngma Kanu Kawa ni marai (500) jan sa du kabu lawm lai ma ai lam chye lu ai.

Jawng yu poi hta Jawngma yawng marai (82) hpe Jawng up, Dr. Nangzing Lu Awn kaw nna jawng yu let mat hte Bachelor Janmau shagrau jaw ya 

Ndai Mai Ja Yang Dakkasu Jawng gaw Wunpawng Mungdan Shanglawt Asuya Hpaji Dap kawn hpaw tawn da ai rai nna Political Science Major, English Major, Devolopment Studies Major, Computer Science Major, Enviromental  Management hte Journalism hpaji ni hpe sharin ya nga ai rai nna, Tsang (10) awng sai ni amyu hpung n-gyin hka kadai rai tim sa lung mai ai lam, dai ni Jawng yu ai jawngma ni hpe Major shagu na  hpaji ningtawn hte kasi ningli kumhpa ni hpe mung shagrau ya sai re lam chye lu ai.

Lai wa sai 2011 ning shawng daw hta gaw KIO Asuya hte Myen Asuya lapran hpaji hte seng nna Shanglawt tsang (10) awng pru sai jawngma ni Myen Mung Dakkasu jawng de mai sa matut lung na matu myit hkrum da lai wa sai raitim 2011 ning kaw nna hpyen majan bai byin hpang wa ai kaw nna Dakkasu htai na ahkang n lu mat ai majaw Wunpawng Mungdan Shanglawt Asuya Ningbaw ni, Kanu Mungdan hte Maigan Mungdan kaw du nga ai Wunpawng amyu sha ni kaw nna Dakkasu Jawng hpaw na matu masing jahkrat da ai hte maren Mai Ja Yang Myu Sha Dakkasu hpe 2015 September shata kawn  hpaw ninghtan hpang wa ai re hpe chye lu ai.

Jawng hta ya aten sharin shara mayak nga ai raitim kade nna ai aten, gaw gap da lu sai jawng wang nnan de htawt sit sharin sa wa na re lam, Daini Janmau gup la ai jawngma ni gaw shawng nnan na Mai Ja Yang Myu Sha Dakkasu a apu asi ni re hte Janmau jaw ai lamang shaning shagu matut manoi nga na rai nna, ndai jawng gaw Taiwan Mungdan, Hungkan kaw hpaw ninghtan da ai Dakkasu jawng ni hte matut mahkai wa lu hkra hpaji madang ni hpe mung grau madang tsaw ai hku sharin sa wa na re lam Dr. Nangzing Lu Awn tsun lai wa ai lam kachinnet shiga dap kaw nna shana dat nga ai.

Thomas

Ref: kachinnet, MNJ