Mai Ja Yang Muklum Hta Covid Ana Kap Ai Masha Hte Ana Kap N Tsen Ai Masha Marai ( 500 ) Jan Rai Sai

Mai Ja Yang Muklum hta masum lang numdaw nna bai sawng wa ai Covid-19 ana kap hkrum ai masha hte ana kap n tsen ai masha  marai ( 500 ) jan rai sai lam Wunpawng Ninghtoi ni shapraw da ai jahpan kaw na chye lu ai.

Ya na zawn covid ana kap ai masha law wa ai majaw Mai Ja Yang Muklum kata lockdown jahkrat tawn da ai aten mung bat mi jan wa sai rai nna grau yak hkak ai dum nta htinggaw ( 257 ) a matu hkyak hkyak byin taw ai mayak mahkak hpe tawt lai hparan lu na matu n gu,sau,jum,shapre, nga bu,shapre bu ni garum jaw ya lu sai.

Bai nna lockdown jahkrat da hkrum ai Pa Kahtawng Hpyen Yen dabang na htinggaw ( 621 ) hpe mung shat mai hpan ( 8 ) hte shan bu,nga bu ,shapre bu ni garum jaw ya lu sai lam ka da nga ai.

Masha law law hpawng chyawm nga ai jawng ni a matu covid makawp maga rai ni rai nga ai n-gup ladi magap mask,ta kashin sapya ntsin,lata laraw,latung gat tsi ntsin,PPE zawn re ai arung arai ni hpe mung masha law law hte hkra hkrum hkawm ra ai ap nawng magam gun ni hpe garan jaw ya lu sai.

Shana shagu n gun rawng ai baw soup ntsin hpe mung garan jaw ya taw nga ai.Ya ana kap hkrum nna tsi tsi hkam la taw nga ai ni yawng gaw hkamja lam kaja nga ma ai hpe chye lu ai.

Ya aten du hkra ana kap hkrum ai masha lani hte lani grau law jat taw nga ai majaw mung, lockdown jahkrat da ai aten na wa na re majaw mung ra kadawn ai lam ni grai naw nga ga ai.

Ana n kap hkrum na matu tinang a dum nta kaw sha nga ga. Yawng a shang lawm garum ya ai hpe grai chyeju dum ai, ra kadawn ai lam ni hta matut nna mung garum shingtau la na hpe garum hpyi dat ai. Ana kap ai masha ni hpe tsi lajang shamai ai hta lang na matu tsi rung na arung arai law law naw ra kadawn nga ai.Oxymeter,Oxygen Plant hte C-vit zawn re ai kaw na hkawt ra kadawn nga ai majaw masha law law hpe hkye na la matu alu ja gumhpraw shang lawm garum la ga nga nna mung Sarama Labang Hkawn Ja  facebook lam yan hku garum hpyi dat nga ai.

Ya ana kap hkrum ai masha law malawng gaw Mai Ja Yang Amyu Sha College,Mai Ja Yang Institute of Education Farther’s Boarding House,( Private School ) Mung Myit Sinli Boarding House,Sinpraw Gintawng Boarding House,Pa Kahtawng IDP Camp kaw na masha ni re ai lam Sarama Labang Hkawn Ja shiga jaw ai kaw na chye lu ai.

Sarama Hkawn Ja ana kap hkrum ai masha ni n gun jaw ga tsun da ai hta -

Tsawra ai Jawng Ma ni e, Covid byin ai gaw nanhte hkrai n rai nga ai. Wa Jau Paul Lahpai Awng Dang mung, nanhte hte rau sha Positive rai taw nga ai. Dai majaw, myit hkum kaji mu. Rau akyu jawm hpyi let, n-gun dating, myit nden shaja nna, ndai Covid hpe tawt lai lu ai amyu sha ni re, ngu ai lam hpe madun ga. Shakut ga.

Hkam Kaja Dap Magam Gun ni, Tsi Du ni law law nanhte hpe garum la nga ma ai. Mungdan asuya kaw nna mung, tsi mawan, arung arai, malu masha ni hkum hkum tsup tsup n rai tim pyi, dang lu ai daram shakut jahkum shatsup da ya nga ma ai.

Buga na CSOs ni rai nga ai WPN, KWAT, BRIDGE ni mung dang lu ai daram shakut garum nga ma ai. Shinggan na jinghku ni mung alu bang ai, akyu hpyi ai hte atsam nachying dat nna shakut garum ya nga ma ai. Covid hpe nanhte hte rau, anhte yawng, jawm gasat nga ga ai.

Covid hpe awng dang ai Padang Dip ai poi hpe Mai Ja Yang Muklung kaw shawng galaw na re. Yawng jawm shakut ga nga nna n-gun jaw ga tsun da nga ai.

Shiga - Julia Ja Ing