Madu Hta Wun Doi Wa Sai Queen Elizabeth II A Matu Wa Sarabyin Francis Hte Hkristan Nawku Hpung Hpa-Awn Ni Yawn Hkyen Let Akyu Hpyi Ya Nga

September 8, bat mali ya shani, Nu Maria a Shangai Nhtoi hta, Wa Sarabyin Francis, Hkawhkam Jan, Queen Elizabeth II si wa, n nga wa sai majaw, yawn hkyen lawm ai lam, kasha alat rai nga ai Hkawhkam, King Charles III hpang de 'Yawn Lahpu Laika' shagun nna, United Kingdom (UK) mung shawa masha ni hte rau  yawn hkyen lawm nga ai lam, yawn shawai shalan shabran ga tsun shana dat ai hpe Vatican Shiga Dap hte Catholic Nawku Hpung Shiga Dap ni kaw nna ndau da ma ai.

Hkawhkam Jan, Queen Elizabeth II a kasi lahpa kaba re ai ap nawng daw jau lam hpe mung, Wa Sarabyin Francis shakawn shagrau ai ga tsun shalawm da ai.

United Kingdom of Great Britain hte Northen Ireland na Hkawhkam Jan, Queen Elizabeth II gaw shi shanu nga ai Scotland mungdan, Balmoral Castle hta September 8, bat mali shana daw maga, Madu hta wundoi wa sai rai nga ai.

Queen Elizabeth II gaw Hkawhkam Jan hku nna 70 jan ning uphkang lai wa sai rai nna, 2022 June 2 ya shani hta Patinum Jubilee hkam la sai rai nga ai.

Hkawhkam Jan Elizabeth II a kasha alat, former Prince of Wales, Charles gaw Hkawhkam tai wa sai rai nga ai (head of state for 14 Commonwealth realms).

"Hkawhkam Jan, Queen Elizabeth II si wa ai majaw yawn kaba yawn nngai; Hkawhkam Jan a kun dinghku ni Hkawhkam Hkawseng wang na magam gun ni, United Kingdom hte Commonwealth na mung shawa masha ni yawng hte rau myit masin salum kaw nna nan yawn hkyen lawm nga nngai" nga nna Wa Sarabyin Fancis yawnhkyen ga tsun da nga ai.

"Mahkra dang chye ai Karai Kasang gaw n yaw n htum mat ai chyeju jaw ya let nang hte na a kaba la ai Hkawhkam lit magam hpe, galoi mung, makawp maga bau sin ya u ga, akyu hpyi ya nga nngai; Nang hte si wa sai Na nu a myit dum hpa lam ni hpe sharawng awng ai ni yawng a ntsa Karai Kasang tut nawng shalan shabran, n-gun jaw ya na matu Karai Kasang kaw na tsaw htum shaman chyeju atsam hte shaman akyu hpyi ya dat nngai" nga nna, ngam nga ai kasha Hkawhkam Charles hte kahpu kanau, kun dinghku masha ni, hkawhkam jan a ntsa sadi dung ai ni yawng hpe mung Wa Sarabyin Francis, akyu hpyi shaman dat nga ai.

Hkawhkam jan Elizabeth II a wenyi hte kam sham ai ni wenyi ni gaw, Karai Kasang a matsan dum ai hte ngwi pyaw ai hta ban sa nga mu ga law!

Asak (96) ning hta si wa sai Hkawhkam Jan, Queen Elizabeth II a wenyi sumsing mungdan woi doi nga lu u ga, Mungkan Ting Na Hkristan Nawku Hpung woi Hpa-Awn Ni Mung Yawn Hkyen Lawm Ai Lam, Akyu Hpyi Ya Nga Ai Lam, RVA English Website kaw nna September 9 ya shani ndau da ma ai.

Anhte RVA magam gun ni yawng mung akyu hpyi ya dat ga ai.

By Fr. Patrick Gawmaw Hkawng Yae

#vaticannews

#rvaenglishnews

#rvakachinservice

https://www.vaticannews.va/en/pope/news/2022-09/pope-francis-telegram-death-britain-queen-elizabeth.html

https://www.rvasia.org/world-news/catholic-leaders-remember-queen-elizabeth-iis-christian-faith