"A Lu Ai Masha" Tang Ai A Marang E, Wa Sarabyin John Paul I Si Wa Ai Lam Hte Seng Nna N Jaw N Teng Ai Shiga Shadam Hpe Shaprai Kau Lu

Wa Sarabyin John paul Iimage from Vatican website

Wa Sarabyin John Paul I kaw akyu hpyi htinglu htinglai chyeju hkam la ai lam, the Holy See Press Office hta, Cardinal Beniamino Stella sakse hkam da ai hpe September 2, bat manga ya shani, Vatican Shiga Dap kaw nna ndau da ma ai.

Wa Sarabyin John Paul I gaw Sarabyin tang hkrum ai shani kaw na nhtoi 34 ya sha nga lai wa nna si wa Sarabyin rai nga ai. Mani sumsai myiman nsam hte tsun shaga chye ai Wa Sarabyin John Paul I a Sarabyin prat nhtoi kadun sha re majaw shi a si wa ai lam hte seng nna masha ni tsun kajai ai lam ni amyu myu nga lai wa ai rai nga ai. Myit shut mang shut ai ningmu ni law law nga lai wa ai rai nga ai.

Sarabyin John Paul I hpe "A Lu Ai Masha" tang na matu sagawn sa wa ai shaloi, shi a laklai ai labau ni hpe mu tam la lu ai: shi a sharin shaga ai lam, shi a wenyi lam hta ngang gring ai lam, Karai Hpaji hkaja ai lam ni gaw kasi la hpa kaba ni rai nga ai.

Bat Manga ya shani, the Holy See Press Office kawn galaw woi ai sang lang hpawng (conference) galaw lai wai ai rai nna, Lina Petri a kasha daw ai, hkum katsing si ai Margherita Marin gaw Wa Sarabyin John Paul nsa hti nna si taw nga ai hkumtsawp moi mang hpe shawng ningnan mu ai wa re lam, Argentine Jau, Wa Jau Juan Jose Dabusti gaw num sha ma langai a matu Sarabyin John Paul I kaw akyu hpyi htinglu htinglai ya ai a marang e mai tsai wa ai re lam Cardinal Beniamino hte shi a sawk sagawn magam hta garum ya ai Stefiania Falasca yan kawn sakse hkam da ma ai rai nga ai.

Sarabyin John Paul I a mying majing gaw Albino Luciani  rai nga ai. Shi a Sarabyin prat hta nihtep ai hku daw jau ya lai wa ai Ma Ma lahkawng gaw shi n si shi yang na, nga sat nga sat tsun shaga ai lam ni hpe sakse hkam da ma ai.

Ma Ma Margherita Marin (a nun of the Congregation of the Sisters of the Child Mary) hte Ma Ma Vincenza Taffarel yan gaw, 1978 September 28 ya shani, si wa sai Wa Sarabyin John Paul I a hkum tsawp hpe shawng mu ma ai re lam sakse hkam da ai.

Sarabyin John Paul I a kanau numsha Antonia a kasha Lina Petri mung Sarabyin si wa na shawng gade nna shi yang, Roma kaw na Sarabyin shagun ya ai postcard ni hpe hkap la  lu ai lam, San Augustine hte San Thomas yan a lam tsun hkai dan let hpaji jaw ga ni tsun shaga lai wa ai lam sakse hkam da ai.

Shayi sha Petri gaw shi a katsa daw ai Wa Sarabyin John Paul I hpe phone hte matut mahkai hkrum shaga ai lam mung galaw ai lam, dai ten gaw Bulluno mare kaba hta Hitler hte Mussolini lapran hkrum zup bangban aten rai nna, Wa Sarabyin gaw, "anhte gaw ndai n hkru ai masha lahkawng a lata kaw nga ra taw ai" nga nna phone kaw na tsun dan wa ai lam labau hte sakse hkam da ai. Shi a katsa daw ai Sarabyin John Paul I gaw majan hta myit kaji garen rai jam jau ai ni, grau nna Yuda masha ni hpe garum shingtau lai wa yu ai wa re lam mung Shayi sha Petri sakse hkam da ai.

Wa Sarabyin John Paul I a mungga gaw daini na mungkan a matu grai akyu rawng grai manu dan ai mungga rai nga ai, nga nna Cardinal Stella sawk sagawn madi madung da nga ai.

Wa Sarabyin John Paul I a lam hte seng nna sawk sagawn yu ai shaloi, shi gaw kaga Sarabyin ni hta aten grau mung n galu ai, grau mung n kadun ai; kaga ni hta grau loi ai hku nga lai wa ai mung n re ai. Ndai gaw labau hpe sung sung sawk sagawn yu ai rai yang mu lu ga ai; shi hpe alak mi shatswm jahtuk nna labau shagawn ai mung n rai nga ai. Sarabyin ni hte seng ai labau sagawn mahkrun masa lam hte maren sha sagawn ai ai nga ai, nga nna Cardinal Stella sakse hkam sang lang da ai.

Sarabyin John Paul I hta kasi la hpa law law nga ai; shi a magam bungli, shi hkum nan a sak hkrung nga sat nga sa lam ni gaw, anhte shi a Sarabyin prat jahkring mi sha hkrum dat ai raitim, anhte a matu kasi la hpa law law nga ai, nga nna Ms. Falasca (vice president of the Vatican foundation) mung sakse hkam sang lang da ai.

Sarabyin John Paul I a Sarabyin prat kadun sha raitim, teng man labau nga ai, laika matsing hte nan nga ai, nga nna mung Ms. Falasca matut sang lang da ai.

Labu (gung) tsi a majaw si wa ai ngu ai shiga shadam ni hte seng nna sawk sagawn let teng man mahtai tam shapraw ya sai hpungtang hpaji ninghkring ni hpe mung grai chyeju dum ai, nga nna chyeju dum ga mung tsun da ai.

Sarabyin John Paul I gaw masha langai ngai e labu tsi hte sat kau hkrum ai nga ai shiga shaje a majaw, shi si wa ai hpang 44 ning tup sumru myit yak lai wa ga ai.

Ndai shiga shaje gaw shut ai shiga re ai hpe aten na myit galu kaba ai hte mabyin masa lam yan ni hpe sawk sagawn mahtai tam sai re lam mung Cardinal Stella hte Ms. Falasca yan tsun shana da ai.

Tsi jep sagawn da ai mahtai (reports and medical records)

Tsi du kaba ni rai nga ai Dr. Mario Fontana hte Dr. Renato Buzzonetti yan gaw Sarabyin John Paul I si wa ai lam hte seng nna kata lam, aten galu, azing ayang jep sagawn lai wa ai yan rai nga ai.

"Hpa majaw ga lajang nna jep sagawn ai lam n galaw ai rai, nga nna, nkau ni san ma ai. Dai hku galaw lu ai tara n nga ai, htung n nga ai. Dai gaw Sarabyin John Paul II a lakhtak 1983 shaning kaw na tara jahkrat da lai wa sai majaw rai nga ai.

Sarabyin John Paul I si wa ai hte seng nna, shi a hkum tsawp n hten mat ai; Dr. Fontana hte Dr. Buzzonetti yan mung ga lajang nna jep shagawn ai lam galaw n ra na re nga nna hpaji jaw lai wa yu ma ai." nga nna Falasca tsun shang lang da ai.

Mani sumsai hte kabu gara nga chye ai wa rai nga ai, hkam ja ai labau mung nga ai Wa Sarabyin John Paul I, lana mi salum ana kumla madun ai kumla, shi a sinda karep nra machyi ai hkam sha yu ai labau nga ai.

Shi gaw dai hpe ahkyak nau n la ai sha, Ma Ma ni hte hkrum ai shaloi, shawoi Ma Ma Marget hpe tsun ga ai ga "Karai Kasang myit ra ai rai yang hpawt de bai hkrum ga, Missa Hkungga rau jawm nawng ga" ngu shakram nna shi nga ai shara de wa ai.

Shi a bu hpun palawng lajang ya ai Ma Ma langai hpe mung, "ma ma e, ngai nang hpe bungli grai shalaw ai zawn rai sai; raitim, grai kahtet nna salat grai pru pru re majaw ngai palawng chyahkring hkring galai ra ra re, ndai palawng hpe gaw wankawk hte hkum htu shatsawm sa; collar hte lawng ta kaw sha wankawk hte htu shatsawm ya rit," nga nna garum hpyi ai sakse nga ai.

Sarabyin John Paul I gaw Karai mungga ka da ai ahtoi nsam (yellow) hte re ai maisau pa hpe mung, lam hkawm shagu, shi a lata hta hpai lang da chye ai. Shi si taw nga ai shaloi mung dai zawn re ai maisau pa shi a lata kaw lang da ai.

Dai maisau pa gaw bat masum ya shani, hpung shawa masha ni hte hkrum shaga ai lamang hta shanhte hpe tara mungga hkaw tsun na matu hkyen da ai maisau pa rai nga ai, nga ai sakse mung nga ai.

 

By Fr. Patrick Gawmaw Hkawng Yae

#vaticannews

#rvakachinservice

Note/ Sarabyin John Paul I a lam grau dam lada ai hku hkaja mayu ai ni Vatican website kaw tam yu mai ai.

https://www.vaticannews.va/en/pope/news/2022-09/pope-john-paul-i-beatification-press-conference-holy-see.html

 

 

 

 

Add new comment

6 + 10 =