Lisu Amyu Sha ni kaw na Numbat langai Kahtawlik Tara Hkaw Sara tai wa ai Sara Kaba Jhon Ngwa Za Di a magam gun prat (50) ning hpring Ja Jubali Chyeju Wunli La Ai Poi hpe Myitkyina, Chyet Pawng Shan Lawk, Kahtawlik Nawku Jawng hta 2021 December shata 18 ya shani galaw lai wa ai.

 Jubali Misa Hkungga Mungga htawn tsun ai Wa Jau Dr.Peter Hka Awng Tu hku nna “Shi magam gun lai wa ai hpe yu dat jang gaw, daini shi hpe Jubali galaw ya ai ngu gaw kachyi sha re, shagrau ai ngu madang sha re, raitim mung shi galaw lai mat ai lam ni gaw manu mana kaba ai lit ni re, Kahtawlik Nawku hpung a tara hkaw Sara ngu ai hta shi gaw tara sha hkaw ai nre. Wuhpung wuhpawng a ningbaw, kahtawng a ningbaw, Amyu sha lam a ningbaw hku nna hkap la let magam bung li galaw mat wa ai Sara re” nga nna Wa Jau Dr.Peter Hka Awng Tu tsun da  ai.Sara kaba a Jubali Poi hpe Myitkyina Sasana kaw na VG Dr.Peter Hka Awng Tu, Myitkyina Ginwang up Wa Jau John Galang La Raw hte kaga Wa Jau ni sa du let Misa Hkungga Nawng Jau ya nna, Wuhpung shagu na Mama ni hte Tara hkaw Sara manaw manang ni, Lisu amyu sha kaw na seng ang ai htunghking ningbaw ningla ni sa du lawm nna Sara kaba hpe shakawn shagrau ai lam ni galaw lai wa ma ma ai.

Sara Kaba Ngwa Za Di gaw Nawku hpung hte seng ai laili laika law law hpe mung Lisu ga de gale ya lai wa sai rai nna Sara kaba a shakut shaja ai majaw ya dai ni du hkra Lisu ga hku Misa hkungga Nawku Dawjau ai lam ni galaw lu ai hte Makam Masham Tara Laika ni hpe mung lisu hku hti hkaja la lu mai sai rai nga ai.

Dai laika lu gale ai hte seng nna “ Ndai laika ni hpe ga gale ai shaloi manu mana lachyum sung ai ga si ni hpe lu ka ai, dai gaw ngai chye nna nre, Chyoi Pra Ai Wenyi Karai Kasang ngai hpe shadut ya ai majaw ndai laika ni hpe sung ai  hku nna, lisu hku lu gale, lu ka ai re” nga nna sak se hkam lai wa ai.

"Ngai danglu dang dep ai made gaw Nawku hpung hta grai shakut da sai re, ya matut nna magam bai galaw gunhpa sa wa lu na matu Akyu hpyi ga, masha mung tam ga, ngu nna ga saw dat mayu ai"

Sara kaba John Ngwa Za Di

Sara kaba gaw Putao Jau Ginwang kaw nna, Lisu Myusha ni hta na shawng nnan, Tara hkaw sara tai ai wa rai nna Karai magam gun (50) ning hpring du hkra Nawku Hpung hta tsang hte tsang magam gun lai wa sai re hpe chye lu ai. Myanmar Mungdan, Lisu Laili Laika hte Htunghking Rudi Komiti Rung hta mung Komiti Amu Madu lit hpe magam gun nna, bungli masing jahkrat galaw let Wuhpung grau dam lada wa hkra shakut lai wa sai lam chye lu ai.

Sara kaba Ngwa Za Di gaw, 1976 Ning Jinghpaw Mungdaw Kahtawlik Sasana Shang Ai (100) ning hpring Jubali Shagrau Kumhpa, Tara Hkaw Sara Magam Gun (25) Ninghpring Gumhpraw Jubali Shagrau Kumhpa, San Columban Nawku Htingnu Gawgap la lu ai (50) ning hpring Shagrau kumhpa, Wa Jau Thomas Nawhkum Lawt Naw Jai Tai (25) ning hpring Gumhpraw Jubili Poi Masat shagrau kumhpa, Amyu Sha Htunghking Ka Manawt Madun Sumpri Shingjawng Poi hta Myanmar Mungdan gumsan Magam malai rai nga ai U Nyet Htun a masat Dazik hte shagrau laika hte ya daini Nawku hpung kawn shagrau ai  magam gun (50) ning hpring shagrau laika ni hte dazik ni hpe mung shagrau hkum lai wa sai rai nga ai.

Jubali poi shani Sara Kaba hku nna “ Ngai danglu dang dep ai made gaw Nawku hpung hta grai shakut da sai re, ya matut nna magam bai galaw gunhpa sa wa lu na matu Akyu hpyi ga, masha mung tam ga, ngu nna ga saw dat mayu ai, dai ni ndai zawn re nna poi galaw ya ai hpe ndang tsun hkra chye ju dum dik ai hku re, matut nna jaw prat latsa du hkra nga lu na matu mung akyu hpyi garum ya marit” nga nna tsun lai wa ai.

Sara Kaba gaw ya ten asak 71 ning de du wa ai rai nna, Myitkyina hte htawt wa let Chyet Pawng Shan kaw nta masha ni hte rau nga nga nna Lisu amyu sha ni a Kanu Kawa Salang langai hku tai nga ai hta sha n-ga RVA-Lisu Nsen Shapoi Dap a ninghpum salang langai hku mung galaw nga ai re hpe chye lu ga ai.

Thomas Mung Hpan